Kuva muri 2019 mu nkiko z'ubucuruzi hakiriwe ibirego 9,576 harangizwa 9,380 naho Urukiko Rukuru rw'Ubucuruzi rwo rwakiriye imanza 3,938, hakemurwa 3,243 mu gihe 695 zitaracibwa.
Mu kiganiro kigamije kugaragaza ishusho ngari n'imiterere y'imanza mu nkiko z'ubucuruzi hasuzumwa ibirarane n'ingamba zo kubihashya yabaye ku ya 28 Kamena 2022, igahuza abashakashatsi, abanditsi b'Urukiko rw'Ubujurire, abacamanza n'abanditsi b'inkiko z'ubucuruzi, hagaragajwe ko hakenewe imbaraga ngo ibirarane birangizwe.
Perezida w'Urukiko Rukuru rw'Ubucuruzi, Mukamurera Clotilde yagaragaje ko zimwe mu mbongamizi bahura nazo harimo umubare w'abacamanza muto cyane mu rukiko rukuru rw'ubucuruzi.
Ati 'Umubare w'abacamanza ni muto ugereranyije n'imanza zinjira. Iyo bigeze mu rukiko rukuru biba ari ubujurire, umucamanza aba agomba kwitondera ibyemezo afata, kuko nta mahirwe aba ahari yo gukomereza mu rukiko rw'ubujurire. Urumva ko bisaba ubwitonzi n'ubushishozi.'
Uyu muyobozi kandi yagaragaje icyorezo cya Covid-19 nka kidobya yakomye mu nkokora imikorere y'urwego rw'ubutabera muri rusange.
Mukamurera Clotilde yanatangaje ko mu ngamba zafashwe ngo iki kibazo gikemuke harimo kugabanya isubikwa ry'imanza rya hato na hato, no gukangurira ababuranyi gukemura ibibazo bafitanye biciye mu bwumvikane, bakanabashishikariza kugana abahuza bigenga.
Ati 'Iyo ibibazo byaje mu nkiko mu nama ntegura rubanza abanditsi barabibakangurira, n'umucamanza abanza kubibakangarurira afasha kugana ubuhuza bwigenga.'
Zimwe mu ngamba zafatwa ngo hagabanywe imanza z'ubucuruzi kandi harimo kugendera ku mirongo n'ibyemezo byafashe n'iniko mu manza zabanje.
Perezida w'Urukiko rw'Ubujurire, François Regis Rukundakuvuga yavuze ko kugendera ku mirongo yashyizweho n'izindi nkiko bigabanya gutinza imanza.
Ati 'Umucamanza abanza gusuzuma ko nta rundi rubanza rusa nk'urwo afite rwaciriwe mu rukiko rumukuriye, kugira ngo ibibazo bisa bihabwe ibisubizo bisa. Ibi bizatuma n'abantu bafite imanza babanza gusuzuma ko nta rubanza rusa rwaciwe n'Urukiko Rukuru cyangwa Urukiko rw'ubucuruzi. Iyo basanze haratanzwe ibisubizo nibyo bahita bakurikiza batiriwe bagana inkiko, kuko kwaba ari ukwigiza nkana'.
Umwe mu bacamanza b'Urukiko Rukuru rw'Ubucuruzi, Byukusenge Marie Claire yatangaje ko kugendera ku murongo watanzwe n'izindi nkiko bizabafasha kunoza ubutabera.
Ati 'Ubusanzwe umucamanza yigaga urubanza akaruca akurikije uko yasobanuye amategeko rimwe na rimwe ugasanga habaye kunyurana kw'imyanzuro yafatiwe ibibazo bisa, ariko ubu tuzajya tugendera ku murongo wafatiwe mu zindi manza, ibi bizadufasha kunoza imikorere no gutanga ubutabera bunoze.'
Mu 2007 nibwo hemejwe rishyiraho inkiko z'ubucuruzi rikanagena imiterere, imikorere n'ububasha byazo. Iri tegeko ryasohotse mu igazeti ya leta muri Werurwe 2008 izi nkinko zibona gutangira ibikorwa byazo ku mugaragaro.
