Perezida w'Amerika Joe Biden avuga ko yakomoje ku iyicwa ry'umunyamakuru Jamal Khashoggi, mu nama yagiranye n'igikomangoma cya Saudi Arabia (Arabie Saoudite) Mohammed bin Salman.
Biden ari muri Saudi Arabia mu kubyutsa umubano, mu gihe mbere yari yarasezeranyije kugira iki gihugu 'igicibwa' kubera uburyo cyitwara ku bijyanye n'uburenganzira bwa muntu.
Yavuze ko yasobanuye neza ko iyicwa ry'uwo munyamakuru w'Umunya-Saudi Arabia ryabaye mu mwaka wa 2018 ari ikibazo cy'ingenzi cyane kuri jyewe no kuri Leta Zunze Ubumwe [z'Amerika]'.
Ariko yanavuze ko ibi bihugu byombi byanagiranye amasezerano ku zindi ngingo.
Uru ruzinduko rwa Biden rwanenzwe nk'urwo guhesha agaciro leta ya Saudi Arabia nyuma y'iyicwa ry'uwo munyamakuru wanengaga iyo leta wabaga muri Amerika.
Khashoggi yiciwe muri ambasade ya Saudi Arabia y'i Istanbul muri Turukiya, mu kwezi kwa cumi mu 2018.
Ubutasi bw'Amerika bwashinje igikomangoma Mohammed bin Salman ko ari we watanze uruhushya rwo kwica uwo munyamakuru.
Iki gikomangoma buri gihe cyagiye gihakana ibyo birego. Abashinjacyaha bo muri Saudi Arabia begetse ubwo bwicanyi kuri ba maneko 'bataye umurongo' b'icyo gihugu.
Nyuma y'iyo nama yo ku wa gatanu, Biden yabwiye abanyamakuru ati:
'Ku bijyanye n'iyicwa rya Khashoggi, narikomojeho mbere na mbere mu nama, nsobanura neza icyo naritekerejeho icyo gihe n'icyo nditekerezaho ubu'.
'Navuze nta guca ku ruhande na gato ko 'kuba Perezida w'Amerika yakwicecekera ku kibazo cy'uburenganzira bwa muntu binyuranye n'abo turi bo ndetse n'uwo ndi we. Buri gihe nzaharanira indangagaciro zacu''.
Biden yavuze ko igikomangoma cyavuze ko 'ubwacyo kitagize uruhare' muri urwo rupfu rw'uwo munyamakuru, nkuko byatangajwe n'ibiro ntaramakuru Associated Press. 'Nasobanuye ko ntekereza ko yarugizemo uruhare', ni ko Biden yavuze ko yasubije iki gikomangoma.
Mbere y'iyo nama, Biden yafotowe asuhuzanya n'igipfunsi n'igikomangoma, bigaragara nkaho umubano ari mwiza hagati y'ibihugu byombi.
Ariko Hatice Cengiz, umukunzi wa Khashoggi, yanenze ibikorwa bya Perezida Biden.
Atangaza kuri Twitter ifoto y'abo bagabo bombi iherekejwe n'amagambo atekereza ko umukunzi we yari kuba yayivuzeho, yanditse ati: 'Uku ni ko kuryoza wasezeranyije ku iyicwa ryanjye? Amaraso y'undi uzakurikiraho mu kwicwa na MBS [Mohammed bin Salman] ari ku biganza byawe'.
Hagati aho, umwanditsi akaba n'umukuru w'ikinyamakuru The Washington Post, Fred Ryan, yavuze ko 'gusuhuzanya n'igipfunsi hagati ya Perezida Biden na Mohammed bin Salman byari bibi cyane kurusha guhana ikiganza â€" byari biteye isoni. Byerekanye ikigero cy'ubusabane n'ituze riha MBS izanzamuka adakwiye yari amaze igihe ashaka cyane'.
Khashoggi yari umwanditsi w'inkuru z'ibitekerezo bye bwite mu kinyamakuru The Washington Post.
Uretse iyicwa rya Khashoggi, Perezida Biden yavuze ko we n'igikomangoma cya Saudi Arabia banaganiriye ku bijyanye n'ingufu (ibitoro) kandi ko yiteze kubona Saudi Arabia â€" igihugu gicukura ibitoro byinshi â€" ifata 'izindi ngamba' zo gutuma isoko ry'ibitoro ribamo ituze (rihama hamwe) mu byumweru biri imbere.
Ashyigikira ibikorwa bya Biden, depite w'Amerika Brad Sherman, wo mu ishyaka ry'abademokarate, yabwiye BBC ko kuba Saudi Arabia yakongera ibitoro ishora ku isoko byarokora ubuzima.
Yagize ati: 'Igiciro cy'ibitoro kivuze ko abantu bapfa mu bihugu bicyennye. Kizamura igiciro cy'ibiribwa n'ifumbire kandi bivuze ko abantu bapfa babarirwa mu bihumbi amagana, atari ukwicwa n'inzara gusa ahubwo n'indwara abafite imirire mibi bakunze kugira [kurwara]'.
'Rero biroroshye cyane ko umugore wa Khashoggi [Hatice Cengiz] ashobora kuvuga ati 'mwihangayikishwa n'abo bantu babarirwa mu bihumbi amagana bazapfa, muhorere umukunzi wanjye'. Hano bisaba ko abantu baba bakuru'.
Biden yanatangaje ko Saudi Arabia izafungura ikirere cyayo ku ndege ziguruka zijya n'iziva muri Israel, mbere zari zaraciwe.
@BBCÂ
The post Saudi Arabia: Biden yakomoje ku iyicwa ry'umunyamakuru Khashoggi appeared first on IRIBA NEWS.
Source : https://iribanews.rw/2022/07/16/saudi-arabia-biden-yakomoje-ku-iyicwa-ryumunyamakuru-khashoggi/
