Kiyovu Sports yemeje ko ibiganiro n'umutoza Patrick Aussems bitararangira kimwe no ku bakinnyi Kimenyi Yves na rutahizamu Emmanuel Okwi.
Ku mugoroba wo ku wa Mbere w'iki cyumweru inkuru yabaye kimomo ko umutoza wagejeje Simba SC muri 1/4 cya Champions League ya 2018-19, Umubiligi Patrick Aussems yamaze kumwera kuzatoza Kiyovu Sports 2022-23.
Ibi byose byatijwe umurindi n'ifoto ya Juvenal ari kumwe na Patrick Aussems ndetse hari n'abanyamakuru yemereye ko yamaze kumvikana na Patrick Aussems.
Ibi byaje kwibazwaho na benshi ubwo inkuru yari imaze kuba kimomo, Patrick Aussems yagiye kuri Instagram akavuga ko ibihuha byose arimo kubyumva ariko we atuje yibereye mu biruhuko, benshi bahise bakeka ko yagarukaga ku makuru amwerekeza muri Kiyovu Sports.
Umunyamabanga wa Kiyovu Sports, Munyangabe Omar yabwiye ISIMBI ko Patrick Aussems atarasinya icyabayeho ari ibiganiro.
Ati "ubu yaba yasinye koko ntimubimenye? Icyabaye ni ibiganiro, ni umutoza mwiza twifuza kandi birashoboka."
Iyi kipe kandi bivugwa ko yamaze kumvikana n'abakinnyi 2 ba yo bari basoje amasezerano barimo Kimenyi Yves wari kapiteni ndetse na rutahizamu ukomoka muri Uganda, Emmanuel Arnold Okwi.
Kuri aba bakinnyi yateye utwatsi amakuru avuga ko baba bamaze kongera amasezerano muri iyi kipe.
Ati "ntabwo Kimenyi arongera amasezerano. Muzabimenya mu minsi iri imbere, kuba hari ibiganiro ibyo umuntu yabivuga byarangiye. Okwi ni umukinnyi mwiza twifuza, ntabwo arongera ariko turamuganiriza, gusa iby'ibiganiro umuntu abibara umukinnyi yamaze gusinya."
Kiyovu Sports nyuma kubura igikombe cya shampiyona ku mukino wa nyuma, yakubise agatoki ku kandi ubu ikaba irimo yongeramo amaraso mashya, harimo kuvugwamo rutahizamu w'umunya-Senegal, Bissirou N'Diaye yamaze kandi no gusinyisha abakinnyi 2 bakomoka muri Sudani y'Epfo, Sharaf Eldin Shaiboub na Mano John.
