Urwibutso Yvan Buravan asigiye Pasiteri Antoine Rutayisire - #rwanda #RwOT

Umuhanzi Yvan Buravan yitabye Imana mu rukerera rwa tariki ya 17 Kanama 2022 afite imyaka 27 azize kanseri.

Ku mugoroba wo kuri uyu wa Kabiri habaye umuhango wo guha icyubahiro no gusezera uyu muhanzi, ubera muri Camp Kigali.

Rev Pasteur Antoine Rutayisire yigishije ijambo ry'Imana muri iki gikorwa cyitabiriwe ku buryo bukomeye , avuga ko nubwo bigoranye kubwiriza ku munsi nk'uyu, ari ngombwa.

Yihanganishije ababyeyi ba Yvan Buravan kuko nawe nk'umubyeyi yumva neza kubura umwana uko bimera.

Past Antoine Rutayisire yatangiye avuga ukuntu yahuye na Yvan Buravan nubwo batamaranye umwanya uhagije.

Ati 'Njyewe na Yvan Buravan twavuganye rimwe duhuriye kuri Kigali Convention Center. Mu mwanya muto twamamaranye yarambwiye ati 'Pastor tuzashakane ' gusa ntabwo byabaye yagize akazi kenshi. Ntabwo nanje namushatse na we ntiyanshatse none dore duhuriye aha. Ni kintu kibabaje ariko ntakundi'.
Rutayisire yigishije ijambo yise 'Agaciro k'ubuzima cyangwa kubaho ubuzima butibagirana' yifashishije amagambo yasomye mu Baheburayo 11: 4-6.

Yagize ati 'Iyo ubonye umuntu agiye akiri muto nka Yvan Buravan uravuga ngo agiye akare Imana yaturushije kumukunda ariko burya nta muntu ugenda kare , kuko agaciro k'ubuzima si umubare w'imyaka umara ku Isi ahubwo ni icyo uyikoraho '.

Yasabye urubyiruko by'umwihariko kwigira kuri Buravan, bagakoresha neza igihe cyabo kuri iyi Si bakiri bato.

Ati 'Iyo Buravan aza kubaho ubuzima bw'ubujura, bwo kunywa urumogi no gutera abakobwa inda ntabwo tuba twicaye hano twaje tungana dutya. Agaciro k'ubuzima si ubwinshi bw'imyaka yawe, ni icyo ushyira mu buzima muri iyo myaka wahawe. Icyo nicyo dukwiriye gutekerezaho. Abenshi bamara ubuzima bwabo bashaka kuvana byinshi mu buzima ariko ntacyo bashyiramo '

Yakomeje agira ati 'Akenshi iyo tubonye abaririmbyi, abahanzi ntabwo tujya tubatekereza mu isura y'abantu bakunda Imana ariko iyo urebye abantu banyuze hano korali n'abandi bitwereka y'uko Yvan Buravan ari umuntu ukunda Imana.'

Yavuze ko nubwo Buravan yaririmbaga indirimbo zisanzwe bitamukuyemo urukundo rw'Imana ari narwo rwibutso yasigiye abantu.

Ati 'Ikintu cya mbere ni ukugira urukundo kandi ugakunda mugenzi wawe nkuko wikunda.'

Yongeyeho ko 'Urubyiruko n'abandi ibi biri kubera hano bitubere ishuri ryo kubaho mu buzima bunezeza Imana , ubuzima bunezeza abandi aho kubaho ubuzima bwinezeza. Ibyo tuzaha abandi nibyo bizatuma twibukwa.'

Umuhango wo guha icyubahiro Yvan Buravan witabiriwe n'abantu b'ingeri zitandukanye baba abakuru n'abato, abayobozi, ibyamamare n'abandi.

Buravan yashimiwe ubwitonzi n'ubumuntu byamuranze akiriho

Ababyeyi b'umuhanzi Yvan Buravan bari bitabiriye uyu muhango wo kumuha icyubahiro

Rutayisire yasabye urubyiruko kwigira isomo ku buzima bwaranze Yvan Buravan

Minisitiri w'Urubyiruko n'Umuco, Rosemary Mbabazi ni umwe mu bifatanyije n'umuryango wa Buravan muri ibi bihe by'akababaro

Ab'ingeri zose bari baje gufata mu mugongo umuryango wa Buravan no kumuha icyubahiro

Abantu benshi guhera saa kumi z'umugoroba bari batonze imirongo kuri Camp Kigali bashaka guha icyubahiro Buravan

Buravan yitabye Imana afite imyaka 27

Rev Pasteur Antoine Rutayisire yavuze ko inshuro imwe yahuye na Buravan yabonye ari umuntu udasanzwe

Amafoto: Shumbusho Djasiri

---

Source : http://igihe.com/amakuru/u-rwanda/article/urwibutso-yvan-buravan-asigiye-pasiteri-antoine-rutayisire