Imodoka yari itwaye ikipe y'umupira w'amaguru muri Brazil, yahanutse ku kiraro kireshya na metero hafi 10 birangira abakinnyi 4 bahasize ubuzima.
Abandi bakinnyi 29 bakomerekeye muri iyi mpanuka yabereye ahitwa Além Paraíba muri Brazil, ubwo umushoferi wari utwaye iyi kipe yitwa Esporte Clube Vila Maria Helena yananirwaga kuyobora iyi modoka.
Ntabwo amazina y'abaguye muri iyi mpanuka bavuzwe ariko byemejwe ko ari ingimbi ziri hagati y'imyaka 14 na 17 n'umuntu umwe ukuze nkuko byatangajwe na G1 reports.
Iyi kipe yari igarutse mu mujyi wa Duque de Caxias ivuye mu mukino w'irushanwa ryo ku rwego rw'igihugu ryitwa Ubaporanga National Cup tournament.
Iyi modoka yarenze ikiraro yikubita mu hasi ubwo umushoferi yataga umuhanda wa BR-116.
Abakinnyi 24 bagize ibikomere bajyanwe mu bitaro bya São Salvador,mu gihe abandi batanu bajyanwe ku bindi bya Casa de Caridade Leopoldinense, i Leopoldina.
Abashinzwe ubutabazi bahise bagera ahabereye impanuka mu gitondo cyo kuri uyu wa mbere.
Iyi kipe yarimo igaruka mu rugo nyuma y'umukino yakinnye na Simonesia ku cyumweru.
Yari iya mbere mu batarengeje imyaka 18 ikaba n'iya kabiri muri U16.
Umwana w'imyaka 16 warokotse yabwiye TV Integração ko yagize amahirwe akicara inyuma kuko igice cy'imbere cyangiritse mu gihe undi we yavuze ko yagerageje kuva muri bisi kubera ko mugenzi we yabashije gufungura urugi.
