Kizigenza Lionel Messi yatangaje ko igikombe cy'isi aheruka gutwara muri Qatar mu mpera z'umwaka ushize cyamuhamagaye ngo aze agifate kuko ngo cyabonye ko yari agikeneye cyane.
Ubwo yarimo aha ikiganiro Radio y'iwabo, Urbana Play,Messi yavuze ko yatwaye igikombe cy'isi kubera ko zahabu yacyo yamuhisemo ngo ayifate.
Uyu mugabo w'imyaka 35 yatsinze ibitego 2 ku mukino wa nyuma bahuyemo n'Ubufaransa bakanganya ibitego 3-3 ndetse anatsinda Penaliti muri 4-2 batsinze kiriya gihugu bari bahanganye.
Yagize ati "Igikombe cyarampamagaye kirambwira kiti," ngwino intware,ubu wankoraho.
Nabonye kiri kumurika muri iriya stade [Lusail Stadium i Doha] sinazuyaza kugisoma."
Messi yatwaye igikombe cy'isi ku nshuro ya gatanu agikinnye aho yatsindiwe ku mukino wa nyuma muri 2014.
Yanakinnye imikino 3 ya nyuma ya Copa America ayitsindwa mbere y'uko atwara igikombe muri 2021.
Yakomeje agira ati "Nyuma yo kubabara no gutsindwa ku mikino ya nyuma,Imana yarakimbikiye."
Uyu yabaye kapiteni wa mbere wa Argentina nyuma ya Diego Maradona mu 1986 watwaye igikombe cy'isi.
Yongeyeho ati "Nari kwishimira ko Maradona ampa igikombe nibura akabona Argentina yatsinze.Mu ijuru yampaye imbaraga nkuko abandi bantu bankunda babigenje."
Maradona yishwe n'umutima muri 2020.
Benshi bari baziko Messi arasezera mu ikipe y'igihugu nyuma yo kwegukana kiriya gikombe ariko yafashe umwanzuro wo gukomeza gukina kugira ngo we na bagenzi be bakinane nk'abatwaye igikombe cy'isi.
Icyakora yemeje ko gusezera ku mupira w'amaguru biri hafi nyuma yo kwegukana Champions League enye,na LA LIGA 10 muri Barcelona, n'igikombe cya Ligue kimwe na PSG.Uyu amaze no gutwara Ballon d'Or 7.
