Nyuma y'uko Mutsinzi Ange asheshe amasezerano ye na CD Trofense ndetse agatanga n'ikirego yishyuza amayero arenga ibihumbi 20 iyi kipe, Ihuriro ry'Abakinnyi (Player's Union) muri Portugal ryatangaje ko uyu mukinnyi yemerewe kuba yakwishakira indi kipe.
Muri Kanama 2021 nibwo Ange Jimmy yasinyiye iyi kipe amasezerano y'imyaka 2, akaba yarasheshe amasezerano na yo mu Kuboza 2022 aho yavugaga ko hari imishahara atahawe.
Uyu musore ukina mu bwugarizi yabwiye ibitangazamakuru byo muri Portugal ko yishyuza iyi kipe ibibararane by'imishahara n'uduhimbazamusyi bingana n'Amayero ibihumbi 20.5 aho yanatanze ikirego mu Rukiko ruri mu Mujyi wa Porto.
Ihuriro ry'Abakinnyi muri Portugal (The Players' Union Legal Committee) bwa mbere ryavuze kuri iki kibazo cya Mutsinzi Ange.
Ryagize riti "Komite y'Ihuriro ry'Abakinnyi iramenyesha ko umukinnyi Ange Mutsinzi yemerewe kuba yasinyira ikipe nshya."
Bakomeje bavuga ko ishami rya bo ry'amategeko rizakomeza gukurikirana iki kibazo, basaba CD Trofense kwishyura uyu mukinnyi amafaranga bamubereyemo.
bati "Ishami ry'amategeko mu Ihuriro ry'abakinnyi ryasabye CD Trofense kwishyura Mutsinzi amafaranga bamufitiye kandi Ishami ry'amategeko rizakurikirana ishyirwa mu bikorwa bya yo."
Ange bivuze ko ashobora kwishyurwa imishahara n'uduhimbazamusyi bingana n'Amayero ibihumbi 20.5, gusa iyi kipe ya CD Trofense yari yavuze ko nta kintu igomba uyu mukinnyi ko ahubwo ari we uzishyura ibihumbi 750 by'Amayero byo gusesa amasezerano nta shingiro.
