Kuri Twitter, Abubakar yavuze ko ishyaka rye ririmo "kubona umubare uri hejuru cyane w'amajwi afite agaciro [atari impfabusa] y'abatoye hamwe n'ikigero cy'amajwi 25% ateganywa n'amategeko nibura muri bibiri bya gatatu bya za leta".
Avuze ibi mu gihe akanama k'igihugu k'amatora (INEC) katangaje gusa ibyavuye mu matora byo muri leta imwe muri leta 36 zigize Nigeria.
Umukandida Bola Tinubu w'ishyaka riri ku butegetsi rya All Progressives Congress (APC) ni we wabonye amajwi menshi kurusha abandi bakandida muri leta ya Ekiti yo mu majyepfo ashyira uburengerazuba bw'igihugu, aho yabonye amajwi 201,494.
Umukuru w'akanama INEC, Mahmood Yakubu, yavuze ko gatangaza bimwe mu byavuye mu matora byo mu zindi leta saa yine ku isaha mpuzamahanga ya GMT kuri uyu wa mbere, ni ukuvuga saa sita (12h) ku isaha yo mu Rwanda no mu Burundi.
Ku cyumweru, akanama INEC kavuze ko karimo gukosora bimwe mu bibazo bito byavutse mu buryo bw'ikoranabuhanga bw'urubuga rw'aka kanama, aho abantu barebera ibyavuye mu matora.
Bibaye nyuma yuko Abubakar ashishikarije INEC gutegeka abakozi bayo gushyira kuri urwo rubuga ibyavuye mu matora byose mu kwirinda amagerageza avugwa ko agamije guteza ikibazo ku byavuye mu matora.
Ibyavuye mu matora ya perezida bya nyuma byitezwe gutangazwa bitarenze ku itariki ya mbere y'ukwezi kwa gatatu, nyuma y'aya matora hamwe na hamwe yaranzwemo urugomo, gutinda gutora hamwe n'ingorane zijyanye n'imikorere n'ibikoresho.
Indorerezi zo mu muryango w'ubukungu w'ibihugu by'Afurika y'uburengerazuba (CEDEAO/ECOWAS) zavuze ko muri rusange aya matora yabaye mu mahoro ndetse akitabirwa ku kigero cyo hejuru.
BBC
