Bruno Fernandez ntabwo yemeranya na Cristiano Ronaldo watangaje ko kuza k'umutoza mushya w'umunya-Espagne, Roberto Martínez Montoliu ari nk'umwuka mushya babonye wo guhumeka.
Umutoza w'umunya-Espagne, Roberto Martínez Montoliu yatoranyijwe nk'umusimbura wa Fernando Santos ku mwanya w'umutoza w'ikipe y'igihugu ya Portugal nyuma yo gukurwamo na Maroc muri 1/4 mu gikombe cy'Isi giheruka kubera muri Qatar.
Cristiano Ronaldo agaruka kuri uyu mutoza yavuze ko kuza kwe byabaye nk'umwuka mushya bongeye guhumeka.
Ati "ni ikiragano gishya kuri buri umwe, ku bakinnyi, abatoza ndetse n'igihugu. Turumva tumeze neza. Ni nko guhumeka umwuka umeze neza."
Ibi ntabwo abihurizaho na Bruno Fernandez wavuze ko icyabaye ari uguhindura umutoza n'aho umwuka wahoze ari mwiza mu ikipe y'igihugu.
Ati "Oya, ni umutoza mushya gusa ufite ibitekerezo bishya. Nta guhumeka umwuka umeze neza, ni igihe cy'impinduka. Umwuka mu ikipe y'igihugu wahoze umeze neza, nta kintu kitari kimeze neza, ntekereza ko ari umutoza mushya ugomba kwemera ibitekerezo bye."
Uyu mutoza amaze gutoza imikino 2 yose yo gushaka itike y'igikombe cy'u Burayi aho yatsinze Liechtenstein 4-0 mbere yo kunyagira Luxembourg 6-0. Cristiano yatsinzemo 4 aho buri mukino yatsinze 2.
Source : http://isimbi.rw/siporo/article/bruno-fernandez-yanyomoje-cristiano-ronaldo
