Kuri uyu wa Gatatu imikino ya nyuma ya 1/8 mu gikombe cy'Amahoro yakinwe, saa cyenda kuri sitade ya Bugesera APR FC yahatsindiye Ivoire Olympic 1-0.
Iki gitego kimwe cyatsinzwe na Ishimwe Christian kuri coup franc yatereye kure cyane, maze umuzamu ayifata yamaze kwinjira mu izamu, iki nicyo gitego cyakoze icyinyuranyo muri uyu mukino.
Mu mukino ubanza iyi kipe ya Ivoire Olympic yari yihagazeho imbere ya APR FC banganya 0-0, ariko muri uyu mukino APR FC yari yagerageje gukinisha abakinnyi bayo bakomeye basanzwe babanza mu kibuga. Abakinnyi babanje mu kibuga badasanzwe babanzamo ni Nshimiyimana Yunusu na Ishimwe Anicet.
I umuzamu wa Ivoire Olympic ajya gufata umupira wageze mu izamu
Mu yindi mikino yabaye, Etincelles FC yaguye miswi 0-0 na Marines FC kuri Sitade Umuganda, bituma Marines FC ikomeza muri ¼ ku giteranyo cy'ibitego 3-1 yari yatsinze mu mukino ubanza.
Musanze FC yo yatsinze Bugesera FC ibitego 2-0 kuri Sitade Ubworoherane mu Karere ka Musanze, bituma inakomeza muri ¼ nyuma y'uko izi kipe zari zaranganyije mu mukino ubanza wabereye mu karere ka Bugesera.
Mu mikino ya 1/4 kirangiza APR FC izahura na Marines FC, Mukura VS ihure na Musanze FC, Rwamagana FC izahura na Kiyovu Sports.
Nyuma y'uko Rayon Sports yikuye mu irushanwa, byatumye Police FC izahura na Intare FC muri 1/4.
Biteganyijwe ko imikino yo kwishyura ibanza izakinwa tariki 04 n'iya 5 z'ukwezi kwa 04 2023.
Umukino warangiye habonetse igitego 1 gusa
