Ku gicamunsi cyo kuri uyu wa Gatandatu tariki 18 Werurwe 2023, nibwo Moussa Faki Mahamat yageze mu Rwanda anyuze ku mupaka wa Nemba mu Karere ka Bugesera avuye mu Burundi.
Uyu mugabo uyobora komisiyo ya AU, amaze iminsi ibiri mu Burundi aho yari mu ruzinduko rw'akazi, aho yagiranye ibiganiro na Perezida Évariste Ndayishimiye.
Mu butumwa yanyujije ku rukuta rwa Twitter, yavuze ko yagize amahirwe yo gutwara imodoka akava i Bujumbura, akagera ku mupaka wa Nemba, akambuka akagera i Kigali.
Yakomeje agira ati 'Urujya n'uruza rw'abantu ni ibintu binyuze mu bushake buhuriweho mu gushaka amahoro, kwihuza n'imibanire myiza ni uku bimera kuri Afurika twifuza.'
Ubwo yageraga ku mupaka wa Nemba, Mussa Faki yakiriwe n'Umuyobozi Mukuru ushinzwe Afurika muri Minisiteri y'Ububanyi n'Amahanga n'Ubutwererane, Shakilla Umutoni Kazimbaya ndetse na Guverineri w'Intara ya Kirundo mu Burundi, Albert Hatungimana.
Mu Ukwakira 2022 nibwo Leta y'u Burundi yatangaje ko yafunguye imipaka yose iyihuza n'ibindi bihugu harimo n'iyihuza n'u Rwanda, yari imaze igihe ifunze nyuma y'agatotsi kaje mu mubano w'ibihugu byombi.
