Urwego rw'Igihugu rw'Ubugenzacyaha-RIB, kuri uyu wa 17 Werurwe 2023 rwatangaje ko rwataye muri yombi Abanyamabanga Nshingwabikorwa b'Akarere ka Nyanza na Gisagara hamwe n'abandi bakozi. Bakurikiranyweho ibyaha birimo gutanga isoko rya Leta mu buryo bunyuranije n'amategeko n'ibindi bya bifitanye isano.
Mu itangazo RIB yashyize ku rubuga rwayo rwa Twitter kuri uyu mugoroba, yagize iti' RIB yafunze abakozi 5 b'Uturere twa Nyanza na Gisagara barimo Abanyamabanga Nshingwabikorwa b'utwo Turere twombi'.
Ikomeza ivuga ko ibyo bakurikiranyweho ari; Ibyaha byo gutanga isoko rya Leta mu buryo bunyuranije n'amategeko, kutubahiriza ihame ryo kuzigamira Leta mu itangwa ry'amasoko, gutanga inyungu zidafite ishingiro ndetse n'akagambane bagiranye na rwiyemezamirimo watsindiye isoko bigateza Leta igihombo.
Urwego rw'Ubugenzacyaha-RIB, rukomeza ruvuga ko Iperereza rikomeje kugira ngo dosiye zabo zikorwe kandi zishyikirizwe ubushinjacyaha mu gihe abafashwe bo bafungiye kuri Sitasiyo ya RIB ya Kimihurura, Kicukiro na Rwezamenyo.
RIB, muri ubu butumwa yongera kwihanangiriza abasesagura cyangwa bakanyereza umutungo wa Leta, ibibutsa ko ibi ari byaha bimunga imari n'ubukungu bw'Igihugu kandi ko bitihanganirwa.
intyoza
