Ingabo za Uganda zinjiye muri DRC n'ibikoresho bikomeye aho zigiye gufatanya n'iza EAC mu kugarura amahoro.Amakuru aravuga ko zinjiriye mu bice bifitwe na M23.
Ubuyobozi bw'Ingabo za Uganda bwabyutse bwemeza ko abasirikare b'iki gihugu bari ku mupaka wa Bunagana aho babombaga kwinjira muri Repubulika ya Demokarasi ya Congo kugarura amahoro.
Abo basirikare bari mu Ngabo z'Umuryango wa Afurika y'Iburasirazuba zatoranyijwe kujya mu butumwa bwo kugarura amahoro, EACRF.
Ingabo za Uganda, UPDF zigomba gukorera muri Teritwari ya Rutshuru mu Ntara ya Kivu y'Amajyaruguru hamaze igihe mu biganza by'umutwe w'inyeshyamba wa M23.
Kuri uyu wa Gatatu, Ubuvugizi bwa UPDF bwanditse kuri Twitter ko abasarikare boherezwa mu butumwa bw'amahoro muri RD Congo bari ku mupaka wa Bunagana aho bategereje guhabwa ibendera rya Uganda.
Herekanywe imodoka z'intambara n'imbunda rutura bagomba kujyana muri Rutshuru guhagarika imitwe y'inyeshyamba irangajwe imbere na M23.
Ingabo za Uganda zisanze muri RD Congo iza Kenya n'u Burundi zatangiye imirimo muri EARCF.
Ingabo z'u Burundi ziri mu bice bya Sake, Kilorirwe, Kitchanga, iza Kenya zigakorera muri Kibumba, Rumangabo, Tongo, Bwiza na Kishishe.
Ni mu gihe Ingabo za Sudani y'Epfo zigomba kujya mu duce twa Rumagabo zigakorana n'iza Kenya, naho Ingabo za Uganda zikajya muri Bunagana, Kiwanja/Rutshuru na Mabenga.
Uganda isanganywe abasirikare basaga 1000 mu bikorwa byo kurwanya umutwe wa ADF, muri Ituri.
