Abinyujije ku mbuga nkoranyambaga, Tricia yasangije abamukurikira ifoto ya Nyirabukwe (witabye Imana) ateruye Tom Close, arangije agira ati "Maman Tom Close wanjye, wabyaye neza! Ijuru rikwambike Ikamba."
Uyu mugore yashimiye Nyirabukwe kuba yaramubyariye umugabo bamaze imyaka icumi bakoze ubukwe, ndetse kugeza uyu munsi bamaze kwibaruka abana bane.
Ni amagambo akurikira ayo uyu mugore yatangaje mu ibaruwa yandikiye nyirabukwe amwifuriza gukomeza kuruhukira mu mahoro.
Icyo gihe nabwo, Tricia yagize ati "Ku mwamikazi wambyariye umutware, ku ntwari nziza yarwaniye Igihugu, komeza uruhukire mu mahoro n'umunezero. Nizere ko ijuru rikwereka wa Junior wasize uko yaje kuba Genius. Ukomeze wambikwe ikamba, tugukunda bihebuje maman Junior wamamaye nka Tom Close."
Tom Close na Tricia bashyingiranywe ku wa 30 Ugushyingo 2013, bivuze ko muri uyu mwaka aribwo bazaba bizihiza imyaka icumi ishize babana.
