Ibi bikorwa ni ibikubiye muri manifesto y'Umuryango FPR Inkotanyi mu nzego z'ubukungu, imibereho myiza, imiyoborere n'ubutabera zifasha mu kugeza ku Banyarwanda iterambere ryihuse.
Wabigaragaje mu Nama Nkuru yawo yabaye mu mpera z'icyumweru gishize, yahuriranye no kwizihiza imyaka 35 uyu muryango umaze ushinzwe.
Mu bikorwa biteganyijwe harimo iby'imishinga minini nk'iyubakwa ry'Ikibuga cy'Indege cya Bugesera. Hazarangizwa igice cya mbere, hatangire icya kabiri.
Biteganyijwe ko hazanubakwa imihanda ya kaburimbo mu Mujyi wa Kigali n'indi mijyi ireshya n'ibilometero 170 n'ihuza uturere y'ibilometero 113 ndetse hasanwe imihanda y'imigenderano ku buryo izava kuri kilometero 3703 ikagera kuri kilometero 51.145 mu 2024.
Hazubakwa amacumbi aciriritse agere ku 4316 avuye ku 2344 mu 2022; ni ukuvuga ko aziyongeraho arenga 1900 ugereranyije n'uko bimeze ubu.
Imidugudu yo guturamo izagera kuri 261 ivuye kuri 252 hirya no hino mu gihugu ndetse gahunda zo kugabanya ingo zituye mu kajagari by'umwihariko mu Mujyi wa Kigali zizakomeza.
Mu bindi bikorwa byihutisha iterambere harimo kongera umubare w'Abanyarwanda bagezwaho amashanyarazi bakazava kuri 61% bakagera ku 100% mu 2024.
Ingufu z'umuriro ukorwa zizava kuri megawatt 311 zigere kuri 365 naho amatara ku mihanda azashyirwa ku mihanda minini kuri kilometero 23473 mu 2024 zivuye ku 1780 mu 2022.
Kubaka, kwagura no gusana imiyoboro y'amazi na byo bizakomeza ku buryo izagera kuri kilometero 1937 mu mijyi ivuye ku 1620 na 1851 ivuye ku 1704 mu byaro.
Mu rwego rwo kwimakaza isuku n'isukura kandi hazubakwa uruganda ruto rutunganya imyanda iva mu ngo i Masaka mu Karere ka Kicukiro, ibi bikaziyongeraho kwagura ikimoteri cya Nduba.
Agaciro k'ibyoherezwa mu mahanga kazongerwa kave kuri miliyoni 3084 z'amadolari kagere ku 5304,6 mu 2024.
Mu guteza imbere ubuhinzi n'ubworozi, ubutaka buhujwe buzagera kuri hegitari ibihumbi 980 mu 2024 zivuye ku bihumbi 766 mu 2022.
Ubuso bw'ubutaka buriho amaterasi y'indinganire buzagera kuri hegitari 142.500 mu 2024 buvuye ku 135.344 mu gihe ubuso bwuhirwa buzagera kuri hegitari 102 284 buvuye ku 68.126 mu 2024.
Ubuso bw'ubutaka buhingishwa imashini buzagera kuri hegitari ibihumbi 100 buvuye kuri hegitari zirenga ibihumbi 70 mu 2022 maze ingano y'imbuto z'indobanure zikoreshwa n'abahinzi ku mwaka izagere kuri toni 8500 ivuye kuri toni 5800.
Amatungo afatirwa ubwishingizi aziyongera. Nibura inka zizagera ku 68.626 zivuye ku 35.517 mu 2022 naho inkoko zizaba 36.4738 zivuye ku 163.124 mu 2022.
Mu rwego rwo kubungabunga ibidukikije amashyamba ya Leta azegurirwa abikorera hagamijwe kunoza imicungire yayo ku buryo azava kuri 38,45% akagera kuri 80%.
Hagamijwe kongera umubare w'Abanyarwanda bakoresha serivisi z'imari abazikoresha bazagera kuri 99% naho abizigamira muri Ejo Heza bazagera kuri miliyoni 3,5 bavuye kuri miliyoni 2,4 mu 2022 ndetse amafaranaga bazazigama azagera kuri miliyari 61,4 avuye kuri miliyari 39 mu 2022.
Koperative Imirenge SACCO zizashyirwamo ikoranabuhanga ndetse zihurizwe muri Banki y'Amakoperative.
Ibyumba by'amashuri biziyongeraho 1370 bishya uhereye mu 2022 ndetse umubare w'abanyeshuri biga mu mashuri y'ubumenyingiro uzagera kuri 60% ubuye kuri 30,5% mu 2022.
Hazashyirwa imbaraga mu gukemura ibituma abana bata amashuri hanashyirwa imbaraga muri gahunda yo gufasha abanyeshuri gufatira ifunguro rya saa Sita ku ishuri n'ibindi.
