Amakuru y'urupfu rwa Edwin Mbanda wari bucura mu muryango w'iwabo yamenyekanye ku gicamunsi cyo kuri uyu wa 18 Mata 2023, gusa icyamwishe ntikiramenyekana neza cyane ko uwahaye amakuru IGIHE yavuze ko 'basanze yapfuye aryamye nta kindi baramenya.'
Edwin Mbanda w'imyaka 31 apfuye mu gihe i Kigali hateraniye inama y'Umuryango w'Amatorero Angilikani mu Isi uharanira gukurikiza inyigisho za Bibiliya, (Global Anglican for Future Conference: GAFCON), inama yatangiye kuri uyu wa 17 Mata 2023 ikazamara iminsi itanu.
Mu butumwa bwanyujijwe kuri konti ya Twitter ya GAFCON, Umuyobozi Mukuru w'uyu muryango, Foley Beach yagize ati 'Ntewe intimba no kubasangiza amakuru y'akababaro y'uko umuhungu wa Musenyeri Laurent Mbanda yitabye Imana bitunguranye aho yabaga muri Leta Zunze Ubumwe za Amerika, ku myaka 31.'
Ati 'Iyi ni inkuru y'inshamugongo. Nifatanyije n'umuryango mugari wa GAFCON, twihanganishije Musenyeri Laurent Mbanda, Umugore we Chantal ndetse n'abana babo Eric na Erica. Twifatanye n'Umuryango wa Mbanda mu masengesho muri ibi bihe bitoroshye.'
