Imodoka itwara abakinnyi b'ikipe ya Liverpool yatewe ndetse yangizwa n'abafana nyuma y'uko iyi kipe inyagiwe na Manchester City.
Liverpool yatsinzwe ibitego 4-1 na The Cityzens ku kibuga Etihad kuri uyu wa Gatandatu mu masaha ya kare cyane.
Icyakora ikipe ya Jurgen Klopp ntiyahiriwe nyuma y'aka kaga ko mu kibuga kuko ubwo bari batashye nyuma y'umukino imodoka yabo yatewe amabuye abakinnyi bayirimo.
Polisi yavuze ko iri gukora iperereza kuri ayo mahano aho itafari ryatewe iyi modoka rimena ikirahuri nkuko The Athletic ibitangaza.
Itangazo ryasohowe na Man City rigira riti "Manchester City FC yamenye ko imodoka ya Liverpool FC yangiritse ubwo ikipe yari itashye nyuma y'umukino.
Twumvise ko ikintu cyatewe kuri iyo modoka mu gace gatuwemo.
Ibikorwa nk'ibi ntabwo byemewe na gato kandi twamaganye byimazeyo ibyo bikorwa n'ababigizemo uruhare.
Tuzafasha cyane polisi ya Greater Manchester mu iperereza kuri iki gikorwa mu buryo bwose dushoboye.
Ntabwo Liverpool yigeze igira icyo ivuga kuri uru rugomo.
City kandi yamaganye abafana baririmbye indirimbo yise ko zidakwiriye zerekeza ku bafana ba Liverpool nyuma y'umukino ndetse isaba imbabazi abafana bababajwe nazo.
