Kiyovu Sports yakomeje kuyobora urutonde rwa shampiyona nyuma yo kugwa miswi na Mukura VS banganya 0-0 mu mukino w'umunsi wa 27 wa shampiyona.
Ni umukino Kiyovu Sports yagiye gukina iyoboye urutonde rwa shampiyona n'amanota 56 irusha APR FC ya kabiri amanota 3, yasabwaga gutsinda kugira ngo ikomeze yizere umwanya wa mbere.
Ku munota wa 12 w'umukino, Mukura VS yabonye uburyo bwa Zubel ariko Kimenyi Yves arokora ikipe ye.
Iyi kipe yongeye kubona uburyo ku ishoti ryaterewe mu kibuga hagati na Habamahoro Vincent ku munota wa 17 ariko Kimenyi Yves awohereza muri koruneri itagize icyo itanga.
Ku munota wa 23, Mukura VS yabonye kufura yatewe na Mukongotya Robert ariko nabwo Kimenyi awukuramo.
Bigirimana Abedi wa Kiyovu Sports yagerageje ishoti ku munota wa 23 ariko Sebwato umupira awufata byoroshye kuko wagendaga gahoro.
Nubwo Kiyovu Sports iri mu rugamba rw'igikombe, ni umukino wari witabiriwe n'abafana mbarwa.
Ku munota wa 34, Mukogotya Robert yinjiranye umupira mu rubuga rw'amahina, atera ishoti rikomeye rinyura kuri Kimenyi rigonga igiti cy'izamu rivamo.
Kiyovu Sports yaje gushyiramo imbaraga ishaka igitego ariko igice cya mbere kirangira ari 0-0, gusa Mukura niyo yihariye igice cya mbere cyane ko ari yo yabonye amahirwe menshi.
Kiyovu Sports yatangiranye imbaraga igice cya kabiri, yahushije uburyo bukomeye ku munota wa 51 ni ku mupira Muhozi Fred yahinduye umupira mu rubuga rw'amahina, usanga Bigirimana Abedi wawuteye yikaraze mu kirere (bicycle kick), ukubita umutambiko w'izamu uvamo.
Amakipe yombi yakomeje gusatirana ashaka igitego ariko biragorana.
Ku munota wa 70, Bigirimana Abedi yacomekewe umupira muremure yinjiranye mu rubuga rw'amahina, awuteye ku izamu habura mugenzi we uwugeraho ujya hanze.
Kiyovu Sports yari yihariye igice cya kabiri, ku munota wa 78, Ssekisambu ahawe umupira asigaranye n'umunyezamu Sebwato anamucaho, ariko awuhinduye mu izamu ntiwajyamo, urengera ku ruhande.
Kiyovu Sports yakomeje kotsa igitutu Mukura ndetss ibona amahirwe binyuze mu bakinnyi bayo nka Abedi na Nordien winjiye mu kibuga asimbura Bertrand ariko umukino urangira ari 0-0.
Undi mukino wahuje APR FC bahanganiye igikombe na AS Kigali warangiye amakipe yombi anganya 1-1.
Kugeza ubu Kiyovu Sports niyo iyoboye urutonde n'amanota 57, APR FC 54 ni mu gihe Rayon Sports izakina ejo ku Cyumweru ari iya 3 n'amanota 52.
Gahunda y'umunsi wa 27
Ku wa Gatandatu tariki ya 28 Mata 2023
APR FC 1-+ AS Kigali
Kiyovu Sports 0-0 Mukura VS
Etincelles 1-0 Police FC
Ku Cyumweru tariki ya 30 Mata 2023
Rayon Sports vs Espoir FC
Sunrise FC vs Musanze FC
Gorilla vs Rutsiro FC
Gasogi United vs Marines
Rwamagana City vs Bugesera FC
