Perezida Kagame ari kumwe na mugenzi we wa Guinea, Col. Mamadi Doumbouya batashye ibikorwaremezo birimo umuhanda mugari n'ikiraro kigezweho bihuza Kagbélen n'umurwa mukuru Conakry,byitiriye Perezida Paul Kagame.
Muri ibi bikorwaremezo harimo umuhanda muremure (highway) wiswe Paul Kagame, uhuza Umujyi wa Kagbélén na Conakry.
Ni ibikorwaremezo bizoroshya urujya n'uruza hagati y'imijyi y'inganda n'umurwa mukuru Conakry na bimwe mu bihugu bihana imbibi na Guinea.
Mu gitondo cyo kuri uyu wa Kabiri kandi, Perezida Kagame ari kumwe na Perezida w'iki gihugu Col. Mamadi Doumbouya, bahuye n'abanyeshuri baturuka mu bice bitandukanye bya Guinea, bitegura kuzavamo abayobozi b'ejo hazaza muri iki gihugu. Ni igikorwa cyabereye ku ishuri rya Gisirikare rya Guinea.
Uyu muhango wo gutaha ibi bikorwa remezo wabaye mu gihe Perezida Kagame akomeje uruzinduko rw'iminsi ibiri yagiriye muri icyo gihugu guhera ku wa Mbere taliki ya 17 Mata.
Uruzinduko rwa Perezida Kagame muri Guinea rugamije gushimangira umubano usanzwe hagati y'ibihugu byombi ndetse n'ubushake bwabyo mu kurushaho gukorana mu nzego zirimo iz'ubukungu, umutekano, ubuhinzi, ubucukuzi bw'amabuye y'agaciro n'umuco.
Perezida Kagame yasuye Guinée nyuma y'uko mu Ukwakira 2022, yakiriye mu biro bye, Minisitiri w'Ikoranabuhanga w'iki gihugu, Ousmane Gaoual Diallo, wamushyikirije ubutumwa bwa Perezida Col Mamadi Doumbouya.
Yaherukaga gusura iki gihugu muri Guinée muri Mata 2017 ubwo yari yitabiriye Inama y'Umuryango wa Afurika Yunze Ubumwe, AU.
Repubulika ya Guinea iherereye mu Burengerazuba bwa Afurika. Abaturage ba yo bajya kungana n'ab'u Rwanda kuko mu 2013 bari miliyoni 13,53. Abagituye bakoresha Igifaransa mu gihe ifaranga ryabo ari iry'imbere mu gihugu rizwi nka 'Guinean Franc'.
Guinea ikora ku Nyanja ya Atlantic. Inazwi ku kugira amashyamba arimo ibiti n'inyamaswa zo mu misozi nk'inguge. Ni igihugu gikungahaye ku birombe bicukurwamo ubutare, zahabu na diamant.
