Real Madrid yasubije perezida wa Barcelona, Joan Laporta, wavuze ko mu mateka iyi kipe yo mu mujyi wa Madrid ariyo "yatoneshejwe cyane n'abasifuzi bo muri Esipanye kubarusha.
Real Madrid yasohoye amashusho yerekana imikoranire Barca ifitanye n''umunyagitugu wayoboye guverinoma ya Espagne,Francisco Franco.
Kuri uyu wa mbere,Perezida wa FC Barcelona Laporta yibasiye Real Madrid,ubwo yireguraga ku birego byo kwishyura amafaranga angana na miliyoni 7 z'amayero uwahoze ari visi perezida wa komite ishinzwe abasifuzi ba Espagne,mu gihe cy'imyaka 17.
Ubu urukiko rurimo gukora iperereza ku bwishyu - bwahawe sosiyete ya Jose Maria Enriquez Negreira hagati ya 2001 na 2018 - kandi Madrid yasabye ko yitabira uru rubanza.
Mu kiganiro cy'amasaha abiri yagiranye n'abanyamakuru Ku wa mbere, Laporta yagize ati: "Twese tuzi ko [Real Madrid] yatoneshejwe n'ibyemezo by'abasifuzi, mu mateka ndetse no muri iki gihe.Ni ikipe yafatwaga nk'iy'ubutegetsi bwa Franco."
"Birakwiye ko twibuka ko, mu myaka mirongo irindwi, benshi mu ba perezida ba komite ishinzwe abasifuzi bahoze ari abanyamuryango, abahoze ari abakinnyi cyangwa abahoze ari abayobozi ba Real Madrid.
Mu myaka 70, abantu bahisemo, batangaga ubutabera mu rkibuga bari abantu bahuye na Real Madrid. Kuri bo kuvuga ko bumva bararenganyijwe n'ukwikunda gukabije.
Nyuma y'iki kiganiro gato, Madrid yashubije Laporta ikoresheje amashusho yashyize ku mbuga nkoranyambaga,ibaza iti "ikipe y'ubutegetsi yari iyihe?"
Aya mashusho y'iminota ine yagaragaje ibintu byinshi Barcelona yakorewe mu gihe cy'ubutegetsi bw'umunyagitugu Franco -kuva mu 1939 kugeza apfuye mu 1975 - harimo no gutaha sitade yabo ya Camp Nou kwa minisitiri w'intebe, ndetse iyi kipe yambika umudali w'icyubahiro Franco.
Madrid na Barcelona bakoranye cyane mu myaka yashize mu gushyigikira icyifuzo cyo gushinga European Super League, ariko uwo mubano wangijwe n'urubanza rwa Negreira.
Abashinjacyaha bavuga ko Barca yashakaga gusifurirwa neza ihitamo kwishyura, mu gihe Laporta we yashimangiye ku wa mbere ko iyi kipe yibasiwe n'akagambane ndetse na serivisi za Negreira - zakozwe n'umuhungu we-zari zishingiye kubyo gushakira amakipe abakinnyi n'iby'imisifurire.
Mu kwezi gushize, Madrid yatangaje ko yifuza kugira uruhare muri uru rubanza, ivuga ko "ihangayikishijwe cyane n'uburemere" bw'ibi birego.
