Umupolisi w'akarere ushinzwe kugenzura iyubahirizwa ry'amategeko yarashe mugenzi we ushinzwe umutekano wo mu muhanda nyuma yo gusanga uyu mugabo hamwe n'umugore we mu cyumba cya lodge i Mbombela, Mpumalanga muri Afurika yepfo.
Ku cyumweru, tariki ya 16 Mata 2023, umuvugizi wa polisi aha Mpumalanga, Moeti Mmusi, yemeje ibyabaye,avuga ko uyu mugore we atigeze akomereka.
Mmusi yagize ati: "Biravugwa ko nyakwigendera yari kumwe n'umugore w'uyu ukekwaho icyaha (umupolisi w'akarere) kuri rimwe mu macumbi igihe ibyo byabga."
Mmusi yavuze ko uyu mugabo ushinjwa ubwicanyi yatawe muri yombi akaba yiteguye kwitaba urukiko vuba.
Yashimangiye kandi ko uyu afite imyaka 38, kandi ko yakoreraga agace kitwa Mbombela nk'umukozi ushinzwe uyubahirizwa ry'amategeko.
Uyu mugabo ngo yamenye ko uyu mupolisi n'umugore we bakodesheje mu macumbi yitwa Kwanyoni niko kujyayo,ahondagura urugi uyu wari wasohokanye umugore we asohoka yiruka undi amukurikiza amasasu aramurasa arapfa.
Uyu wishe mugenzi we ngo yahamagawe kuri polisi arizana bahita bamufunga ndetse bamwambura imbunda ye yakoresheje yica mugenzi we.
