Iniesta, w'imyaka 39, azakina umukino we wa nyuma muri iyi kipe ku itariki ya mbere Nyakanga (7), ubwo umwaka w'imikino wa shampiyona y'icyiciro cya mbere mu Buyapani, izwi nka J-League, uzaba ugeze hagati.
Iniesta â€" kugeza ubu muri uyu mwaka w'imikino umaze gukina nk'umusimbura mu mikino itatu gusa mu ikipe ya Vissel iri ku mwanya wa mbere â€" nta gahunda afite yo guhita asezera ku mupira w'amaguru.
Yagize ati: "Ndashaka kurangiza igihe cyanjye hano neza nuko ndebe andi mahitamo ahari kuri jyewe.
"Ndashaka gukomeza gukina ubundi nsezere ngikina. Ibyo biragoye kuri jyewe kuba nabikorera hano, rero ndashaka kubona ahantu nshobora kuzasezerera nyuma".
Iniesta yageze mu ikipe ya Vissel mu 2018 ndetse amaze kuyikinira imikino 133.
Ari kumwe na bagenzi be, mu 2019 batsindiye igikombe cy'Umwami w'Abami (Emperor's Cup) cyo mu Buyapani, no mu 2020 batsindira igikombe cya Super Cup cyo muri icyo gihugu.
Ibyo byakurikiye imyaka 22 yari amaze muri Barcelona, aho yatsindiye ibikombe 32 mu mikino 674 yo ku rwego rw'abakinnyi bakuru.
Yavuze ko guhitamo kuva muri iyi kipe ya Vissel ari "kimwe mu byemezo bigoye cyane mfashe mu gukina umupira kwanjye".
Yagize ati: "Buri gihe natekerezaga ko nzasezera ku mupira hano, ariko ibintu ntibyagenze uko nabishakaga.
"Mu mezi macye ashize, nakoze imyitozo cyane nshaka gutanga umusanzu mu ikipe, ariko natangiye kwiyumvamo ko umutoza afite ibindi ashyize imbere bitandukanye".
