Ni imirwano yabereye mu gace ka Kabukomo ko muri Teritwari ya Masisi gaherereye mu bilometero bibarirwa mu 10 uvuye mu mujyi wa Kitchanga.
Nyatura na APCLS bamaze igihe bafatanya n'Igisirikare cya Congo (FARDC) ndetse n'umutwe wa FDLR, mu mirwano n'inyeshyamba za M23.
Sosiyete Sivile yo muri Kivu y'Amajyaruguru ivuga ko abarwanyi ba M23 bafite ibirindiro mu gace ka Kirumbu ari bo batangije iriya mirwano.
Nta cyo uyu mutwe uravuga kuri aya makuru, gusa bivugwa ko imirwano yamaze amasaha abiri mbere y'uko M23 basubira inyuma.
Ni imirwano bivugwa ko yasize abatuye muri kariya gace bahisemo guhunga.
Agace ka M23, Nyatura na APCLS barwaniyemo karabarizwamo Ingabo z'u Burundi zoherejwe mu butumwa bw'Umuryango wa Afurika y'Iburasirazuba bwo kugarura amahoro muri Congo (EACRF).
M23 ku ruhande rwayo iracyagenzura ibirindiro byayo biri mu duce twa Kibatsiro, Kirumbu na Busumba ho muri Masisi.
