Tinubu w'imyaka 71 yatsinze amatora muri Gashyantare uyu mwaka, yiyemeza kugarura icyizere mu baturage ariko ibibazo bikomeye birimo iby'ubukungu n'umutekano biramutegereje.
Yasimbuye Muhammadu Buhari wari utegetse manda ebyiri mu gihe cyaranzwe no gutakaza agaciro kw'ifaranga, ukwiyongera kw'amadeni y'igihugu no gushimuta abantu bakarekurwa ari uko bishyuye ingwate.
Intsinzi ya Tinubu yamaganwe mu rukiko n'abo bari bahanganye babiri bavuga ko ibyayavuyemo bitanyuze mu mucyo, icyakora Buhari utarigeze yongera kwiyamamaza nyuma y'imyaka umunani yamaze ku butegetsi, yavuze ko amatora yanyuze mu mucyo no mu bwisanzure.
Perezida Tinubu yabwiye Abanya-Nigeria ko uyu muhango wo kurahira ari uw'agaciro gakomeye.
Nigeria ifite amadeni agera kuri miliyari 103 z'amadolari ya Amerika ndetse yibasiwe n'ibibazo by'itakazagaciro k'ifaranga, igipimo cy'ubushomeri kiri hejuru, agaciro k'ibikomoka kuri peteroli kaguye mu gihe ari kimwe mu byo ikesha ubukungu bwayo. Ibi bituma urubyiruko rusuhukira imbere mu gihugu ku bwinshi.
