Abategetsi bo mu Burusiya, bavuga ko umutwe witwaje intwaro wambukiye muri icyo gihugu uvuye muri Ukraine unyuze mu karere ka Belgorod ko mu Burusiya, kandi ko gukozanyaho kwahabereye hari abantu bagukomerekeyemo.
Guverineri w'ako karere Vyacheslav Gladkov yavuze ko abasirikare b'Uburusiya barimo gushakisha abo yise abononnyi, bateye akarere ka Grayvoronsky banyuze ku mupaka.
Umuvugizi wa Vladimir Putin, yavuze ko uyu Perezida w'Uburusiya yabimenyeshejwe.
Ukraine ihakana ivuga ko nta ruhare ibifitemo ndetse yavuze ko Abarusiya bo mu mitwe ibiri yitwara gisirikare ari bo bagabye icyo gitero.
Guverineri Gladkov yavuze ko abantu umunani bakomeretse, barimo babiri bajyanwe ku bitaro nyuma yuko icyaro kimishweho ibisasu ndetse abantu batatu bagakubitwa n'ibice by'ibisasu mu mujyi wa Grayvoron.
Yavuze ko imirwano yanangije inzu eshatu n'inyubako y'ubutegetsi yo muri ako gace kandi ko ibintu n'ubu bikomeye cyane.
Guverineri Gladkov yavuze ko igikorwa cyo guhashya abakora iterabwoba cyatangiye muri ako karere, ibi bikaba byahaye ububasha bwihariye abategetsi, burimo no kugenzura imyirondoro no kugenzura itumanaho.
The post Uburusiya bwatewe n'umutwe witwaje intwaro wo muri Ukraine appeared first on FLASH RADIO&TV.
