Kuwa Gatatu tariki ya 3 Gicurasi 2023, mu irushanwa ryitiriwe Umukuru w'Igihugu, Umurenge Kagame Cup, amakipe yakinnye umukino ya 1/2 cy'irangiza. Umurenge wa Nasho na Rwimiyaga mu bagabo niyo yabonye itike yo guhura ku mukino wa nyuma. Mu bagore ikipe ya Rugarama ikazahura na Kamabuye.
Mu mukino w'ishiraniro wabereye kuri Sitade ya Ngoma, ikipe y'Umurenge wa Nasho yari ihagarariye Akarere ka Kirehe yahuye n'umurenge wa Gishari wari uhagarariye Akarere ka Rwamagana mu mukino waranzwe no guhatana ku mpande zombi.
Uwo mukino warangiye ikipe y'umurenge wa Nasho itsinze umurenge wa Gishari wo mu Karere ka Rwamagana ibitego 2 kuri 1.
Mu yindi mikino yabaye muri iryo rushanwa, ikipe y'umurenge wa Rwimiyaga yatsindiye kuri Sitade ya Nyagatare ikipe y'umurenge wa Ngarama mu Karere ka Gatsibo ibitego bibiri kubusa.
Mu makipe y'abagore ikipe y'umurenge wa Kamabuye uhagarariye Akarere ka Bugesera yasezereye umurenge wa Rukumberi wari uhagarariye Akarere ka Ngoma ibitego 2 kuri 1.
Umurenge wa Rugarama watsinze umurenge wa Murambi igitego 1 ku busa, iyo mirenge yombi ni iyo mu Karere ka Gatsibo.
Kugira ngo hamenyekane umurenge uzahagararira Intara y'Iburasirazuba mu bagabo no mu bagore mu irushanwa ry'Umurenge Kagame Cup, biteganyijwe ko umurenge wa Rwimiyaga wo muri Nyagatare uzakina ku mukino wa nyuma n'uwa Nasho wo mu Karere ka Kirehe mu mukino uzabera i Nyagatare.
Naho ikipe y'umurenge wa Rugarama wo mu Karere ka Gatsibo izahura na Kamabuye yo mu Karere ka Bugesera.
