U Rwanda rukomeje gutera imbere mu bikorwa bitandukanye birimo umuziki na siporo, aho kugera ubu ngubu  u Rwanda rumaze kugira ibikorwa remezo bigezweho bituma birushaho gutuma biryoha.
Uhereye kuri sitade mpuzamahanga iri i Huye, Kigali Pele Studium iri i Nyamirambo na Stade Amahoro iri mu bikorwa byo kuvugururwa aho mu bihe bya vuba nayo iba yatangiye gukoreshwa.
Hari n'ibindi bikorwa remezo bitandukanye birimo n'iby'imikino y'intoki ku isonga BK Arena yamaze no kuba ubukombe mu kwakira ibikorwa by'imyidagaduro bikomeye muri Afrika.
Kugera ubu kandi hari na Intare Arena, Canal Olympia, Kigali Conference & Exhibition Village (KCEV) ahazwi nka Camp Kigali, Kigali Convention Center (KCC) n'ahandi hatandukanye kandi heza hakoreshwa.
Uko ibikorwa remezo bigenda bitera imbere ni na ko n'ababikoresha bagenda biyongera kandi ukabona ko birushaho kuzamura iterambere ry'igihugu n'ibyishimo ku banyarwanda.
Ariko na none nubwo bikorwa gutyo bisa nk'aho hakiri icyuho mu kubasha kubibyaza umusaruro mu buryo bunoze, kutamenya kwigira ku bandi cyangwa wenda akaba ari ikibazo cy'ubushobozi.
Urebye uburyo bikorwa n'abategura irushanwa nyafurika rya Baskeball, BAL, ubona ko biri ku rwego mpuzamahanga aho usanga bagerageza guhuza umuziki na siporo kandi bikarushaho kuzamura ibyishimo no kongera umubare w'abitabira iri rushanwa.
Kimwe no mu mikino y'amagare izwi nka Tour du Rwanda naho usanga bagerageza kubihuza kandi bikarushaho kongera uburyohe bw'irushanwa.
Ni ibintu bisanzwe bikorwa muri shampiyona zitandukanye mu bihugu bitandukanye byamaze gutera imbere kandi ugasanga birushaho kuzamura uburyohe no mu buryo bw'ubucuruzi bikazamuka.
Urugero ni nko mu gikombe cy'isi aho usanga hatumiwe abahanzi batandukanye bo kujya gususurutsa abitabira iy'imikino, yaba muri Champions League, The Superbowl n'ahandi, usanga babihuza kandi bikaryoshya irushanwa bigatanga akazi n'ibindi.
Kuri ubu mu Rwanda bisa nk'aho abategura imikino, abategura ibitaramo, abakinnyi n'abahanzi batagira ikintu kibahuza buri rwego rukora ukwarwo, ibyo bikaba bisa nk'ibidindiza iterambere ry'izi nzego zose.
Wakwibaza uzatunganya umushinga wo guhuza shampiyona n'ibindi bikorwa by'ubuhanzi by'umwihariko umuziki. Biramutse bikozwe, byarushaho kugira umumaro.
Nk'ubu rwagati mu mikino hakabaye hashyirwaho umwanya umuhanzi akaba yasusurutsa abitabiriye. Mu gusoza shampiyona hagategurwa igitaramo kiyiherekeza bitari mu mupira w'amaguru ahubwo mu mikino muri rusange.
Urugero nk'igikombe cy'Amahoro giheruka gusozwa aho cyegukanwe na Rayon Sports intsinze APR FC, iyo haba hari igitaramo cyari cyateguwe nyuma y'umukino cyari bwitabirwe kandi bikarushaho kuzamura ibyishimo by'irushanwa.
Si ho honyine nk'ubu abana bato baheruka kwegukana igikombe cy'isi bo mu kademi ya PSG nabo iyo haba hateguwe igikorwa runaka cyo kubakira byari kurushaho kuryoshya ibintu.
Ni intambwe ikwiriye guterwa n'amashyirahamwe yose bigatangira gutekerezwaho kuko hari umumaro wo hejuru byazagira yaba mu iterambere ry'imikino n'umuziki dore ko buri rwego rufite abafana barwo ariko guhuza imbaraga byarushaho kuzamura umubare w'ababyitabira.
Iyo umuziki uhujwe n'imikino bitanga umusaruro, aba ni abahanzi baheruka guhurizwa mu bitaramo byaherekeje Tour du Rwanda 
Football America imaze kwamamara kubera igitaramo gikomeye kizwi nka The Superbowl Halftime kiba rwagati muri iyi mikino
Kuri ubu abantu benshi bari kugana muri Turkey ahazabera imikino ya nyuma ya Champions League atari kubera imikino gusa no kuba Burna Boy rurangiranwa mu njyana ya Afrobeat azajya kuyiririmbamo
Imikino y'irushanwa nyafurika rya Baskeball ikomeje kugira igikundiro cyo hejuru kubera uburyo yamaze guhuzwa n'umuziki
