Kiyovu Sports nyuma yo kubura ibikombe byose yahataniraga mu mwaka w'imikino 2022-23, yamaze kumvikana n'umutoza w'umurundi Ndizeye Jimmy kuza kuyitoza mu mwaka w'imikino wa 2023-24.
Nk'uko ISIMBI ibikesha umwe mu bantu b'i Burundi kandi bavugana umunsi ku munsi n'uyu mutoza, ni uko we na Kiyovu Sports bamaze kumvikana kuba yayibera umutoza.
Amakuru avuga ko ubwo Juvenal yari i Burundi ari kimwe mu byamujyanye guhura n'uyu mugabo ndetse na we akaba yari mu Rwanda mu mpera z'icyumweru gishize aho yabonanye n'ubuyobozi bw'iyi kipe, yasubiye i Burundi ku munsi w'ejo hashize ku wa Mbere.
Ndizeye Jimmy watoje ikipe y'igihugu y'u Burundi, akaba yatozaga Le Messager Ngozi bivugwa ko yumvikanye na Kiyovu Sports kuyitoza imyaka 2.
Nubwo yumvikanye n'umutoza, iyi kipe bivugwa ko igiye gukora impinduka aho uhereye ku batoza Alain-Andre Landeut ndetse na Mateso Jean de Dieu bagomba gutandukana nayo.
Si mu batoza gusa ahubwo no mu bakinnyi bivugwa ko izasezerera benshi ihereye ku banze kujya gukina umukino w'umwanyawa 3 w'igikombe cy'Amahoro batsinzwemo na Mukura VS 1-0 ku wa Gatandatu w'icyumweru gishize bayobowe na kapiteni w'iyi kipe, Kimenyi Yves, ba myugariro Ndayishimiye Thierry (usoje amasezerano), Aimable Nsabimana n'abandi benshi.
Source : http://isimbi.rw/siporo/article/kiyovu-sports-ivugwamo-umweyo-yabonye-umutoza-mushya
