Umunyarwanda Imanishimwe Emmanuel [Mangwende] ukinira FAR Rabat muri Maroc, yafashije iyi kipe kwegukana igikombe cya shampiyona yaherukaga mu myaka 14 ishize.
Ejo nibwo shampiyona y'icyiciro cya mbere muri Maroc yasojwe igikombe kikaba cyaregukwanywe na FAR Rabat.
FAR Rabat yagiye gukina umukino usoza shampiyona na Ittihad Tanger ari iya mbere ariko irusha Wydad inota rimwe.
Yari ibizi neza ko ikosa yakora yatakaza igikombe. Yabonye igitego hakiri kare ku munota wa 8 gitsinzwe na Reda Slim, gusa cyaje guhita cyishyurwa Elhadji Konate ku munota wa 14. Amakipe yagiye kuruhuka ari 1-1.
Ku munota wa 48 Ahmmed Hammoudan yatsindiye FAR Rabat igitego cya kabiri ni mu gihe Mohsine Moutouali yaje kwishyurira Tanger ku munota wa 75.
Iminota 90 yarinze irangira nta zindi mpinduka ari nako igitima cy'abafana ba FAR Rabat cyadihaga, gusa ku munota wa 3 w'inyongera Reda Slim yatsinze igitego cy'intsinzi kuri penaliti. Umukino warangiye ari 3-2.
FAR Rabat yahise yegukana igikombe yaherukaga mu mwaka w'imikino wa 2007-2008. Ni umukino Mangwende yakinnye iminota 90 yose.
Source : http://isimbi.rw/siporo/article/mangwende-yafashije-ikipe-ye-kwandika-amateka-nyuma-y-imyaka-14
