BBC yatangaje ko kuri uyu wa Gatatu aribwo Pence atangaza ko yinjiye mu bashaka kwiyamamariza kuyobora Amerika.
Uyu mugabo w'imyaka 63 agiye kwisanga ku rutonde ahanganye na Trump yahoze yungirije guhera mu 2016 kugeza mu 2021.
Trump na we yagaragaje ko aziyamamariza guhagarira ishyaka rye mu matora ateganyijwe umwaka utaha.
Mu bushakashatsi bushingira ku bitekerezo by'abantu batandukanye bugenda bukorwa, Pence aza ku mwanya wa gatatu mu bahabwa amahirwe yo kuba batorerwa guhagarira ishyaka ry'aba-Républicains.
Imyaka ine y'ubutegetsi bwa Trump, Pence yayimaze yitwararika cyane gusa yaje gushwana n'uwo yahoze yungirije mu 2021 ubwo batumvikanaga ku byavuye mu matora.
Trump yashakaga ko Pence amushyigikira bakamagana intsinzi ya Joe Biden ariko Pence arabyanga.
Pence yitabiriye umuhango wo kwemeza Biden nka Perezida mu Nteko Ishinga Amategeko, mu gihe abashyigikiye Trump bayigabagaho igitero ngo bagirire nabi abarimo imbere.
Mu bigaragambyaga icyo gihe harimo abaririmbaga indirimbo z'umujinya bavuga ko bashaka kubona Pence amanitswe ku giti.
Pence usanzwe ari umwe mu bakirisitu bakomeye, yiteze kwifashisha ababwirizabutumwa n'amadini mu kurushaho kwigizwaho amajwi azamugeza mu biro bya Perezida wa Amerika.
Mu bo agomba guhigika ngo agere kuri uwo mwanya harimo Trump, Guverineri wa Leta ya Florida Ron DeSantis, Senateri Tim Scott na Nikki Haley wahoze ari Ambasaderi wa Amerika muri Loni
