Real Madrid yemeranyijwe na Borussia Dortmund ku masezerano yo kugura umukinnyi wo hagati w'Umwongereza Jude Bellingham kuri miliyoni 103 z'ama-Euro (miliyari 124Frw).
Uyu mukinnyi w'imyaka 19, wageze muri Dortmund mu kwezi kwa Nyakanga (7) mu 2020 avuye muri Birmingham City, ni umwe mu bakinnyi bitwaye neza cyane mu ikipe y'igihugu y'Ubwongereza mu gikombe cy'isi cyo mu 2022.
Bellingham arashaka kwerekeza muri Real ndetse azakorerwa isuzumwa na muganga mu minsi micye iri imbere.
Uyu mukinnyi wo hagati, washakishijwe n'amwe mu makipe akomeye y'i Burayi, azashyira umukono kuri kontaro yo gukinira Real imyaka itandatu.
Mu itangazo, Dortmund yemeje ko Real yemeye kuriha miliyoni 103 z'ama-Euro kuri uyu mukinnyi, ndetse ko bishoboka ko hari amafaranga y'inyongera kuri ayo ngayo.
Mu gihe izo nyongera zaba zibayeho, amasezerano yo kugura Bellingham ashobora kugera kuri miliyoni 133.9 z'ama-Euro.
Manchester City na Liverpool ni amakipe abiri yari mu yashaka cyane Bellingham, witezweho kuba umukinnyi wa gatatu w'umupira w'amaguru uguzwe amafaranga menshi cyane ku isi uri munsi y'imyaka 20.
Uyu wabaye umukinnyi w'umwaka muri shampiyona y'icyiciro cya mbere mu Budage, Bundesliga, azanaba umukinnyi wa kabiri w'umupira w'amaguru uhenze cyane w'Umwongereza ndetse n'umukinnyi wa kabiri uhenze cyane Real Madrid iguze, nyuma ya Eden Hazard yaguze kuri miliyoni 115 z'ama-Euro mu 2019 avuye muri Chelsea.
Bellingham yavuye muri Birmingham ajya muri Dortmund kuri miliyoni 25 z'amapawundi, aba umukinnyi w'imyaka 17 wa mbere uhenze cyane ku isi mu mateka y'umupira w'amaguru.
Yitwaye neza muri Dortmund, ndetse mu kwezi kw'Ukwakira (10) mu mwaka ushize, yanditse amateka aba kapiteni w'iyo kipe wa mbere muto mu myaka, ku myaka 19.
Muri uyu mwaka w'imikino, Bellingham yakiniye iyo kipe imikino 42, ayitsindira ibitego 14 ndetse atanga imipira irindwi yavuyemo ibitego.
Source : https://umuryango.rw/imyidagaduro/imikino/article/real-madrid-yaguze-umkinnyi-wa-dortmund-ku-kayabo
