Umukinnyi w'umunyarwanda ukina muri Moldova mu ikipe ya Zimbru FC, Rubanguka Steve yamaze gusezererwa n'iyi kipe mu gihe ari ku mpera z'amasezerano ye.
Iyi kipe yasoje ku mwanya wa gatatu muri shampiyona ikaba yaranabonye itike yo kuzakina UEFA Europa Conference League bivugwa ko yatandukanye n'abakinnyi benshi.
Muri abo bakinnyi harimo na Rubanguka Steve wari ufite amasezerano azarangira tariki ya 30 Kamena 2023 aho babwiwe ko bagomba kwishakira andi makipe.
Iyi kipe bivugwa ko yakoze izi mpinduka mu rwego rwo gushaka abakinnyi bashya bari ku rwego rwiza bazayifasha muri UEFA Europa Conference League y'umwaka w'imikino wa 2023-24.
Rubanguka Steve utegerejwe mu Rwanda mu ikipe y'igihugu ku munsi wo ku Cyumweru tariki ya 11 Kamena 2023, bivugwa ko ashobora kuguma muri iki gihugu aho ashobora gusinyira Sherrif yasoje ku mwanya wa mbere izakina UEFA Europa League.
Source : http://isimbi.rw/siporo/article/rubanguka-steve-wahamagawe-mu-mavubi-yasezerewe-n-ikipe-ye
