Pastor Théogène Niyonshuti wakoreraga umurimo w'Imana mu Itorero rya ADEPR Kamuhoza Paruwase ya Muhima mu Rurembo rwa Kigali, yitabye Imana tariki 22 Kamena 2023, azize impanuka yabereye i Kabale mu gihugu cya Uganda ubwo yari avuye kwakira abashyitsi be i Kampala.
Mu bumvise inkuru ibabaje y'urupfu rwe bagashengurwa bikomeye harimo Rev. Isaie Ndayizeye Umushumba Mukuru wa ADEPR; Minisitiri w'Ubutegetsi bw'Igihugu, Jean Claude Musabyimana; Minisitiri w'Urubyiruka, Dr. Utumatwishima; King James, Anitha Pendo, Junior Giti, Apostle Dr. Gitwaza, Aline Gahongayire, Clapton Kibonge, Egidie Bibio, n'abandi.
Ishimwe Josh ukunzwe mu ndirimbo "Reka Ndate Imana", yatangaje ko yababajwe n'urupfu rwa Theogene Niyonshuti, ariko avuga ko hahirwa abapfa bafira mu Mwami. Ati: 'Igihe cye yagikoreshe neza, azanira benshi guhindukirira umusaraba, abantu bayoboka inzira y'agakiza. Imana ikomeze umuryango we, inshuti ndetse nabavandimwe Yesu ababere byose'
Umuramyi Fabrice Nzeyimana yanditse ati "Aya makuru ni mabi cane. Nakunda cane inkuru ziwe, intahe, gutwenza ariko cane cane ubutumwa bwiza yigisha bwo guca bugufi, gukunda abantu bose utarobanuye no kwitangira abandi. Ruhuka amahoro mukozi w'Imana Théogène".
Itorero ADEPR ryanditse kuri Twitter riti "Ubuyobozi bw'Itorero ADEPR bwihanganishije umuryango wa Pastor Theogene Niyonshuti, Abanyetorero ADEPR bose, inshuti n'abavandimwe be ku bw'urupfu rwa Pastor Theogene rwabaye mu ijoro ryo ku wa 22/06/2023 azize impanuka yabereye mu gihugu cya Uganda nkuko umuryango we ubitangaza".
Pastor Theogene Niyonshuti yabarizwaga muri ADEPR ariko yavugaga ubutumwa bwiza mu matorero yose ya Gikristo yamutumiraga. Yaherukaga kubwiriza mu giterane "In His Dwelling" cya Zion Temple Ntarama mu kwizihiza isabukuru y'imyaka 5. Umushumba Mukuru wa Zion Temple ku Isi, Apostle Dr Paul Gutwaza, yagize icyo avuga ku rupfu rwa Pastor Theogene.
Ati "Njye n'umuryango wanjye, hamwe na AWM / ZTCC dutewe umubabaro w'urupfu rw'umukozi w'Imana n'incuti ya benshi Pasitori Theogene. Ruhukira mu mwami imirimo myiza yawe iguherekeze. Ibakozwe 13:36….Dawidi amaze gukora ibyo Imana yashatse mu gihe cye arasinzira, ashyirwa kuri ba sekuruza arabora'.
Theogene ruhuka kuko umaze gukora ibyo Imana yashatse mugihe cyawe. Twihanganishije umugore wa nyakwigendera, abana be, umuryango we n'incuti n'itorero muri ibi bihe bigoye kandi bikomeye muri kunyuramo. Turabasengera kugirango Imana ibahumurize . Mukomeze muhange amaso Yesu Kristo niwe ubasha kuziba icyuho gitewe no kwitaba Imana Kwa Pasteur Theogene. Mugire amahoro".
Aline Gahongayire ukunzwe mu ndirimbo zirangajwe imbere na Ndanyuzwe", yanditse kuri Instagram ko azi neza ko Pastor Theogene ari kumwe na Yesu. Ati "Shumi nziza, iruhukire mu mahoro, wari inshuti ya Yesu, nzine za ko akwitayeho. Turababaye ariko nibutse ko imirimo y'Imana muri wowe yavuze neza".
Korali Jehovah Jireh y'abanyeshuri bize muri ULK, yagaragaje ko yari ifitanye ivugabutumwa na Pastor Theogene. Bati "N'ubwo twari dufitanye nawe ivugabutumwa tuzakora mu Karere ka Musanze mu kwezi kwa 08.2023, Urugendo rwawe rurangiriye aha, ugiye guhabwa ingororano z'imirimo myiza wakoze".
Mu butumwa banyujije kuri Facebook no ku zindi mbuga nkoranyambaga bakoresha, aba baririmbyi baririmbye "Gumamo", bakomeje bavuga ko urupfu rwa Pastor Theogene Niyonshuti rwashenguye abantu benshi yafashije "haba mu buryo bw'iby'Umwuka n'iby'uyu mubiri".
Bati "Ntabwo tuzibagirwa ukuntu wakundaga gukorera Imana ukanabitoza abakiri bato!! PASTOR THEOGENE NIYONSHUTI, ruhukira mu mahoro. Jehovah Jireh Choir twifatanije n'umuryango, Itorero n'inshuti za Pastor Theogene muri ibi bihe bitoroshye: Umugeni aratashye!".
Amakuru inyaRwanda yamenye ni uko iyi mpanuka ikomeye yabereye muri Uganda, yahitanye abantu batatu ari bo Pastor Theogene, umukobwa witwa Devotha ndetse n'umusore bari kumwe. Muri iyo modoka yari itwawe na Pastor Theogene harokotsemo umuntu umwe ari we umuhanzi Donath Ntezimana - we ari muri coma ubu akaba arwariye mu bitaro bya Kanombe.Â
Muri kwasiteri ya Simba Coach yajyaga i Nairobi ari nayo yagonze imodoka yari itwawe na Pastor Theogene, umugore umwe ufite ubwenegihugu bwa Kenya ni we wakomeretse ku kaguru. Abageze aho iyi mpanuka yabereye, basanze ari muri Kabale Regional Referral Hospital ari ho arwariye ategereje ko benewabo yari avuye gusura mu Rwanda bamugeraho.
INKURU WASOMA: Yakoreye Imana akebura urubyiruko! Urupfu rwa Pastor Theogene rwashenguye Abaminisitiri, Ibyamamare,...
Pastor Theogene yakoreye Imana neza mu gihe cye
Impanuka yahitanye abarimo Pastor Theogene yabereye muri aka gace
Imodoka yari itwawe na Pastor Theogene yashwanyaguritse ipfiramo abantu batatu
Kwasiteri yagonganye n'imodoka ya Pastor Theogene nayo yangiritse, umuntu umwe arakomereka
IBYATANGAJWE N'ABATURANYI BA PASTOR THEOGENE NYUMA Y'URUPFU RWE
INYIGISHO YA NYUMA YA PASTOR THEOGENE YAYITANZE MURI ZION TEMPLE NTARAMA
