Polisi y'u Rwanda ku bufatanye n'ubuyobozi bw'inzego z'ibanze mu Karere ka Gisagara yafashe umugabo w'imyaka 40 y'amavuko, ucyekwaho kwiba moto yo mu bwoko bwa Yamaha AG100.
Yafatiwe mu Mudugudu wa Kamweko, Akagari k'Agahabwa mu Murenge wa Kigembe, ahagana ku saa Munani z'ijoro ryo ku wa Kane, tariki 3 Kanama 2023.
Uyu mugabo yasunikaga moto acyekwaho kwiba mu Mudugudu wa Ruvugizo, Akagari ka Higiro mu Murenge wa Nyanza na wo wo mu Karere ka Gisagara.
Amaze gufatwa yemeye ko bari bayibye bafite gahunda yo kuyishakira umukiliya, ku bw'amahirwe make lisansi ikaza kubashiriraho, ari na yo mpamvu bafashwe bayisunika.
Uwafashwe yashyikirijwe Urwego rw'Ubugenzacyaha (RIB) kuri Sitasiyo ya Nyanza, mu gihe hagishakishwa uwatorotse, moto bafatanywe isubizwa nyirayo.
