Manchester United yamaze kwemera kuba yagurisha Emeran Noam ufite inkomoko mu Rwanda mu ikipe ya FC Groningen yo mu Buholandi.
Emeran Noam w'imyaka 20 uvuka kuri Nyina w'Umunyarwandakazi na se Emeran Fritz Nkusi wakiniye Amavubi, yari asanzwe akinira abatarengeje imyaka 21 ba Manchester United.
Ni umukinnyi wari kumwe na Manchester United nkuru ubwo yiteguraga umwaka w'imikino wa 2023-24 aho yanatsinze igitego Leeds muri Norway.
Nk'uko ikinyamakuru Manchester Evening cyabitangaje, ni uko uyu mwana usatira anyuze ku mpande iyi kipe igiye kumurekura ngo ajye aho azabona umwanya uhoraho wo gukina.
Ni umukinnyi ngo wifuzwaga n'amakipe menshi y'i Burayi nk'intizanyo ariko Manchester isanga kumugurisha ari byo byafasha umukinnyi.
Emeran yinjiye muri Manchester 2019 avuye muri Amien aho yifuzwaga n'andi makipe nka Juventus, Barcelona na Paris Saint-Germain.
Mu mwaka ushize w'imikino, mu mikino 36 yakiniye Manchester United y'abatarengeje imyaka 21, Emeran Noam yayitsindiye ibitego 7.
Emeran Noam ni umwe mu bakinnyi bafite inkomoko mu Rwanda bifuzwa cyane n'ikipe y'igihugu Amavubi ariko akaba ataremera kuba yakinira u Rwanda.
Source : http://isimbi.rw/siporo/article/manchester-united-mu-nzira-zo-kugurisha-rutahizamu-w-umunyarwanda
