Nyuma y'amasaha make atangaje ko yatandukanye n'ikipe y'igihugu Amavubi, Umunya-Espagne Carlos Alós Ferrer yatangajwe nk'umutoza mushya wa Belarus.
Uyu munsi ku wa Mbere tariki ya 8 Kanama 2023 ni bwo Carlos Alós Ferrer yatangaje ko yatandukanye n'ikipe y'igihugu Amavubi ayifuriza ibyiza.
Uyu munsi kandi nibwo perezida w'Ishyirahamwe rya Ruhago muri Belarus, Nikolai Sherstnev, yahaye Carlos Ferrer amasezerano azarangirana na 2024, ariko akaba ashobora kongerwa mu gihe yagera ku byo yasabwe.
Carlos Alos yasabwe gufasha Belarus kubona itike ya EURO 2024 no kwitwara neza mu mikino ya UEFA Nations League ya 2024/25.
Hagati ya 2003 na 2009, Carlos Alós Ferrer, yabaye Umutoza mu makipe ya Amposta, Roquetence na Tortosa yo muri Espagne, mu gihe kuva mu 2009 kugeza mu 2011 yari Umutoza wungirije muri Kitchi FC yo muri Hong Kong.
Hagati ya 2011 na 2014, yakoze mu Ikipe y'Abatarengeje Imyaka 19 ya FC Barcelone, ahava ajya gutoza Pogon yo muri Pologne mu 2015, mu gihe hagati ya 2017 na 2018 yari muri Kairat yo muri Kazakhstan aho yegukanye igikombe cy'igihugu.
Mu 2019, yatoje AS FAR muri Maroc na Qatar SK, mu 2020-2021 ajya mu Enosis yo muri Chypre mu gihe guhera muri Werurwe 2022 yari Umutoza w'Amavubi yavuyemo adatsinze umukino n'umwe w'irushanwa mu mezi 18 yamaze akorera i Kigali.
