Umunyapolitiki utavuga rumwe n'ubutegetsi muri Zimbabwe, Nelson Chamisa, waje ku mwanya wa kabiri mu matora ya Perezida, yashinje Perezida Emmerson Mnangagwa kwiba ubutegetsi binyuze mu matora.
Chamisa, w'imyaka 45, ni umukuru w'ishyaka CCC (Citizens Coalition for Change).
Yavuze ko ibyavuye mu matora yo ku wa gatatu ushize byatangajwe n'akanama k'amatora ari ikinamico.
Yavuze ko indorerezi z'amatora zavuye mu mahanga na zo zageze ku mwanzuro nk'uwo.
Ntibitunguranye kuba aya matora birangiye abayemo impaka.
Mu kiganiro n'abanyamakuru mu murwa mukuru Harare, Chamisa, wagize amajwi 44% mu gihe Mnangagwa yagize 52.6%, yashinje akanama k'amatora gutangaza ibyavuye mu matora bitari ukuri.
Kugeza ubu Chamisa nta gihamya yari yatanga y'ibyo birego bye. Afite igihe kitarenze icyumweru ngo abe yamaze kugeza mu rukiko ikirego cye.
Chamisa yavuze ko hazaba impinduka muri Zimbabwe, ishyaka ZANUâ€"PF rya Mnangagwa ryabishaka cyangwa ritabishaka, yavuze ko atazategereza indi myaka itanu (ahateganyijwe kuba andi matora).
Mnangagwa, w'imyaka 80, yapfobeje ibivugwa n'abanyamahanga banenze ayo matora, ashimangira ko amatora yo muri Zimbabwe yabaye mu mucyo.
Zimwe mu ndorerezi zirimo n'izo muri Afurika y'amajyepfo, Â zavuze ko ayo matora atageze ku kigero gisabwa ku rwego mpuzamahanga ndetse n'igisabwa n'itegekonshinga rya Zimbabwe.
Mnangagwa ari ku butegetsi kuva mu 2017, nyuma y'ihirikwa ry'uwahoze ari Perezida w'igihe kirekire wa Zimbabwe Robert Mugabe, wapfuye mu 2019.
The post Perezida Mnangagwa yashinjwe kwiba amajwi mu matora y'umukuru w'igihugu appeared first on FLASH RADIO&TV.
