Mu gihe hasigaye iminsi 7 gusa ngo APR FC na Rayon Sports zicakirane mu mukino w'igikombe kiruta ibindi mu gihugu "Super Cup", amwe mu amatike yashize ku isoko.
Uyu mukino uteganyijwe mu mpera z'icyumweru gitaha tariki ya 12 Kanama 2023 ubere kuri Kigali Pelé Stadium.
Super Cup izahuza Rayon Sports yegukanye Igikombe cy'Amahoro na APR FC yegukanye Igikombe cya Shampiyona, amatike yatangiye kugurishwa tariki ya 28 Nyakanga 2023.
Ibiciro mu myanya y'icyubahiro ni 20 by'amafaranga y'u Rwanda ku munsi w'umukino ,bizaba ari ibihumbi 30, ahatwikiriye ibihumbi 10 by'amafaranga y'u Rwanda, ku munsi w'umukino bizaba ari ibihumbi 15 ni mu gihe ahasigaye hose ari ibihumbi 3 by'amafaranga y'u Rwanda, ku munsi w'umukino bizaba ari ibihumbi 5.
Gusa bisa n'aho aya matike atazagezayo kuko aya mbere yamaze gushira ku isoko aho itike y'ibihumbi 3 y'ahasigaye hose na tike y'ibihumbi 20 muri VIP ubu zamaze gushira. Ku isoko hasigaye itike y'ibihumbi 10 y'ahatwikiriye gusa.
Umukino uheruka guhuza Rayon Sports na APR FC hari ku mukino wa nyuma w'igikombe cy'Amahoro cya 2023 cyegukanywe na Rayon Sports itsinze 1-0.
