Mu gihe bisigaye bigoye kubona itsinda ry'abanyamuziki rimara kabiri ritaratandukana, itsinda ry'abasore babiri rya Flexin Paka rimaze imyaka itanu riha abanyarwanda imiziki ijyanye n'igihe kandi yiganjemo ubutumwa bugenewe urubyiruko.
Aba basore b'abanyemano mu muziki, Rukumbi n'uwitwa Bless Bwite, bitezweho gushimisha abakunzi ba muzika nyarwanda binyuze mu ndirimbo nshya yabo ya gatanu bamaze no gushyira hanze yitwa 'Generation (Kweli)' ikubiyemo ubuzima bubi urubyiruko rw'iki gihe rubayemo kubera amadeni menshi ruterwa no gukunda iraha.
Mu kiganiro na InyaRwanda, Bless Bwite umwe mu bagize iri tsinda Bless Bwite, yatangaje ko igitekerezo cy'iyi ndirimbo cyavuye ku myitwarire isigaye iranga urubyiruko rwabaswe n'iraha.Â
Yavuze ko benshi mu rubyiruko basigaye bakunda guhora mu birori, ugasanga birabatera guhora mu madeni bitewe n'uko batagikunda no gukora, abandi ugasanga barishora mu busambanyi kugira ngo babone amafaranga bashora muri iryo raha ibyo basigaye bita 'Gutwika.'
Agaruka ku butumwa bashakaga gutanga muri iyi ndirimbo, Bless Bwite yagize ati: 'Twashakaga gukangurira urubyiruko kwirinda kurya amadeni menshi kubera iraha, bakirinda guhora mu tubari n'ibirori bya buri munsi, bagakura amaboko mu mifuka bagakora.'
Iri tsinda rya Flexin Paka rimaze gushyira hanze indirimbo eshsnu ziganjemo iz'ibirori nka Hasi, In Case bakoranye na Yvan Mpano, Maybe n'izindi. Bavuga ko mu rugendo rwabo muzika bashyize imbere gukora ibihangano byiza kandi byinshi mu rwego rwo kurushaho kwiyegurira imitima y'abakunzi bamaze kunguka.
Indirimbo yabo nshya 'Generation' imaze amasaha make isohotse, mu buryo bw'amajwi yatunganijwe na Winner Beatz, naho amashusho agatunganwa na Bless World Music.Â
Bless Bwite ubarizwa mu itsinda rya Flexin Paka
Rukumbi, uhuriye mu itsinda rimwe na Bless Bwite
Flexin Paka, itsinda rifite intego yo gutza imbere umuziki nyarwanda
