Ku gicamunsi cyo kuri iki cyumweru nibwo Rayon Sports yashyize hanze itangazo ryemeza ko yatandukanye n'uwari umutoza wayo Yamen Zelfani. Rayon Sports yemeje ko uyu mutoza batandukanye ku buryo bw'ubwumvikane.
Ibi bije nyuma y'umusaruro utari wishimiwe n'ubuyobozi bwa Rayon Sports, kugera n'aho abafana bifuzaga ko yirukanwa.
Kuri uyu wa Gatandatu, nibwo Rayon Sports yakinnye umukino w'ikirarane na Marine FC, amakipe yombi anganya ibitego 2-2, abafana bava i Gisenyi bitonganya.
Mu cyumweru gishize kandi nabwo, Rayon Sports yananiwe gusezerera Al-Hilal Benghazi mu mikino ibiri yabereye i Kigali, nabwo bivugwa ko uyu mutoza yabigizemo uruhare.
Tariki ya 10 Nyakanga nibwo uyu mutoza ukomoka muri Tunisia, yasinyiye Rayon Sports amasezerano yarimo ingingo yazabageza mu mikino y'amatsinda ya CAF Confederation Cup.
Yamen Zelfani w'imyaka 43, yanyuze mu makipe arimo FC Nouadhibou yo muri Mauritania, Al-Merrikh yo muri Sudani, Dhofar yo muri Oman, JS Kabylie yo muri Algeria, AS Soliman yo muri Tunisia, Al-Kawkab yo muri Arabie Saudite, Al-Talaba yo muri Iraq na Jeddah yaherukagamo mbere yo kuza muri Rayon Sports.
Yamen Zelfani abaye umutoza wa mbere utandukanye n'ikipe muri uyu mwaka w'imikino mu RwandaÂ
