Impera z'icyumweru zagenze neza kuri bamwe mu bakinnyi b'abanyarwanda bakina hanze aho igitego cya Djihad Bizimana cyafashije ikipe ye gufata umwanya wa mbere ni mu gihe Ntwari Fiacre yagejeje ikipe ye ku mukino wa Knockout Cup.
Muri iyi nkuru tugiye kurebera hamwe uko abakinnyi b'abanyarwanda bitwaye mu mpera z'icyumweru gishize.
Meddie Kagere - Singida Fountain Gate
Rutahizamu w'umunyarwanda, Meddie Kagere yari yabanje mu kibuga mu mukino wa shampiyona banganyijemo na JK Tanzania ku wa Gatanu. Iyi kipe ubu ni iya kane n'amanota 19 ku rutonde ruyobowe na Yanga n'amanota 24.
Manishimwe Djabel - USM Khenchela
Ntabwo impera z'icyumweru zagenze neza ku ikipe ya Mansishimwe Djabel mu cyiciro cya mbere muri Algeria aho ku wa Gatanu w'icyumweru gishize, USM Khenchela yatsinzwe na Canstantine 2-0. Nyuma y'umunsi wa 8 iyi kipe ni iya 12 n'amanota 10 ku rutonde ruyobowe na MC Alger n'amanota 21.
Sibomana Patrick Papy & Emery Bayisenge - Gor Mahia
Sibomana Patrick Papy yari yabanje mu kibuga mu mukino wa shampiyona w'umunsi wa 13 muri shampiyona y'icyiciro cya mbere muri Kenya ikipe ya Gor Mahia yaraye itsinzemo Kariobangi Sharks 2-1 ihita ifata umwanya wa mbere n'amanota 27. Emery Bayisenge aracyafite imvune ntiyakinnye.
Ntwari Fiacre - TS Galaxy
Ntwari Fiacre umunyezamu wa TS Galaxy muri Afurika y'Epfo, yaraye afashije ikipe ye kugera ku mukino wa nyuma wa Knockout Cup batsinda Amazulu 3-2. Ku mukino wa nyuma bazahura na Stellenbosch.
Hakim Sahabo - Standard Liege
Uyu mukinnyi nyuma y'uko ku wa Gatandatu akinnye iminota 75 muri Standard de Liège y'abato asanzwe akinira bagatsindwa na Zulte Waregem 3-1, ejo yari yazamuwe mu ikipe nkuru yatsinzwe na Club Brugge 2-0, nta munota n'umwe yakinnye.
Maxime Wenssens - Royale Union Saint-Gilloise
Ntabwo umunyezamu w'umunyarwanda, Maxime Wenssens yari muri 18 baraye bifashishijwe n'ikipe ya Union Saint-Gilloise mu mukino w'icyiciro cya mbere mu Bubiligi iyi kipe yatsinzemo Cercle Brugge 2-1. Iyi kipe iyoboye urutonde n'amanota 38.
Bizimana Djihad - FC Kryvbas Kryvyi Rih
Bizimana Djihad ukinira FC Kryvbas Kryvyi Rih mu cyiciro cya mbere muri Ukraine, yafashije ikipe gufata umwanya wa mbere nyuma yo gutsinda igitego cy'intsinzi ku munota wa 83 mu mukino w'umunsi wa 16 batsinzemo Oleksandria ku wa Gatandatu w'icyumweru gishize 2-1. Iyi kipe ni iya mbere n'amanota 33 inganya na Dnipro-1.
