Shampiyona y'ikiciro cya mbere yakomezaga ku munsi wayo wa 13, aho amakipe akomeye amwe n'amwe yatakaje amanota andi akitwara neza.
Ku mukino wabereye mu karere ka Bugesera FC, Ikipe ya Police yaraye ihatsindiwe ibitego 4-2 uba umukino wa mbere umutoza Haringingo atsinze kuva ageze muri iyi kipe yo mu Burasirazuba.
Ku ruhande rwa Bugesera FC, ni ibitego byatsinzwe na Gakwaya Léonard, Byiringiro David, na Ani Elijah watsinze ibitego bibiri, kuri Police na Bigirimana Abedi na Dukundane Pacifique witsinze.
I Huye ikipe y'Amagaju yatsinzwe na Musanze FC ibitego bibiri ku busa, ni ibitego byatsinzwe na Methaba Methano na Peter Agblevol.
Sitade Umuganda, ikipe ya Marines FC yahatsindiye ikipe ya Etoile de l'Est ibitego 3-2, naho Gorilla FC I Nyamirambo yahatsindiwe na Sunrise FC ibitego 2-0.
Ikipe y'ingabo z'igihugu ya APR FC niyo yasoje imikino yo kuri uyu wa kabiri, aha yakinnye na Gasogi United, umukino urangira ari ubusa ku busa.
Kuri uyu wa Gatatu, Mukura VS irakira ikipe ya Kiyovu SC iHuye, Etincelles FC irakina na AS Kigali kuri Sitade Umuganda naho Rayon Sports kuri Kigali Pele Stadium irakira ikipe ya Muhazi United.
Kugeza ubu ku rutonde rw'agateganyo ikipe ya APR FC irayoboye n'amanota 27 irakurikirwa na Musanze FC ifite 26 naho Police FC ifite 25 mugije Rayon Sport ifite amanota 23.
The post Ku munsi wa 13 wa PNL, APR FC yatsikiye, Police FC itsindwa na Bugesera FC, Rayon irakira Muhazi United appeared first on RUSHYASHYA.
