Bikubiye mu itangazo ryashyizwe hanze na Minisiteri y'Imari n'Igenamigambi mu gitondo cyo kuri iki Cyumweru tariki 24 Ukuboza 2023, ryashyizweho umukono na Minisitiri w'Imari n'Igenamigambi, Dr Uzziel Ndagijimana.
Iri tangazo rivuga ko hashingiwe ku itegeko rishya ryo muri Nzeri uyu mwaka wa 2023, Minisitiri w'Imari n'Igenamigambi amenyesha abafite ubutaka n'amazu bisorerwa ko 'umusoro ku butaka, ku mazu no ku nyungu z'ubukode bw'umwaka wa 2023 uzishyurwa hagendewe ku bipimo bishya nk'uko bigaragara mu itegeko No 048/2023 ryo ku wa 05/09/2023 no mu iteka rya Minisitiri No 002/23/10/TC ryo ku wa 24/11/2023.'
Iri tangazo rikomeza rigira riti 'igihe ntarengwa cyo kwishyura umusoro ku butaka, ku mazu, no ku nyungu z'ubukode by'umwaka wa 2023, cyongerewe kugeza ku wa 29 Gashyantare 2024.'
Iby'ingenzi wamenya mu igabanuka ry'umusoro
Amabwiriza ya Minisitiri w'Imari n'Igenamigambi yo gushyira mu bikorwa itegeko rishya ry'umusoro yasohowe na mu kwezi k'Ugushyingo 2023, ateganya ko umusoro ku nzu wavuye ku mafaranga ari hagati 0 na 300 Frw ujya ku mafaranga ari hagati ya 0 na 80 Frw kuri metero kare imwe, ndetse inzu zo guturamo zisonerwa umusoro.
Aya mabwiriza yahuje umusoro w'inzu n'ubutaka iriho, ushyirwa kuri 0,5% uvuye kuri 1%, ni ukuvuga ko wagabanyijwe ku kigero cya 50%.
Uretse kuba inzu yo guturamo yarasonewe umusoro, n'inzu igeretse amagorofa atatu, na yo yagabanyirijwe umusoro, uva kuri 0,50% by'agaciro kayo, ushyirwa kuri 0,25%.
Ni mu gihe inzu z'ubucuruzi zo, umusoro wazo washyizwe kuri 0,3% uvuye kuri 0,5% zasoreshwaga mu itegeko rya mbere, mu gihe inzu z'inganda zo zizasoreshwa 0,5%, kandi umusoro ukaba ari uw'inzu n'ubutaka, mu gihe mbere inzu yasoreshwaga ukwayo n'ubutaka ukwabwo.
Ku butaka
Itegeko rishya riteganya ko ubutaka bufite hegitari zitarenze ebyiri buri mu gice cyagenewe ubuhinzi, zasonewe umusoro, kimwe n'ubutaka buri mu gace kataragezwamo ibikorwa remezo nk'imihanda n'amashanyarazi, na bwo bukaba butazasorerwa.
Nanone kandi ubutaka n'inzu bifite agaciro katarengeje miliyoni 5 Frw, mu gihe bigurishijwe, na byo ntibizasora, mu gihe ibirengeje aka gaciro bizajya bisoreshwa 2,5% ku muntu ku giti cye, na 2% kuri kompanyi ibugurishije.
Ku bukode
Ni mu gihe kandi ubukode bw'amafaranga ari hagati ya 0 n'ibihumbi 180 Frw, butazajya busoreshwa, naho hagati y'amafaranga y'ubukode ari hagati y'ibihumbi 180 Frw na Miliyoni 1 Frw azajya asoreshwa 20% hatabariwemo ibihumbi 180%.
Naho amafaranga y'ubukode ari hejuru ya Miliyoni 1Frw, azajya asoreshwa 30%, na bwo habanje gukurwamo asoreshwa 20%.
UKWEZI.RW
