Uruganda rwenga ibinyobwa bisembuye n'ibidasembuye rwa SKOL Brewery, rwashyikirije Ishyirahamwe ry'Umukino w'Amagare mu Rwanda, FERWACY, ibikoresho birimo n'amagare bizafasha mu iterambere ry'uyu mukino.
Ni umuhango wabaye kuri uyu wa Gatanu tariki ya 22 Ukuboza 2023 ubera mu Nzove ku cyicaro gikuru cy'uru ruganda.
Eric Gilson umuyobozi w'uru ruganda, yavuze ko iki gihe cy'iminsi mikuru basanze ari cyo gihe cyiza cyo gutanga impano mu rwego rwo gushyigikira iterambere rya Siporo mu Rwanda.
Yavuze ko ibi bikoresho bizafasha abahungu n'abakobwa bakina uyu mukino kwitegura no kwitwara neza mu marushanwa y'imbere mu gihugu no hanze yacyo by'umwihariko Shampiyona y'Isi y'Amagare izabera mu Rwanda 2025.
Ati "iki gikorwa kigamije gufasha abakinnyi b'umukino w'igare mu Rwanda kurushaho kwitoza neza ndetse no guhangana mu marushanwa yaba ay'imbere mu gihugu ndetse no hanze yacyo. Ibi bikoresho bizafasha bamwe mu bakinnyi kurushaho kwitegura shampiyona y'Isi, izabera mu Rwanda mu 2025."
Umuyobozi wa FERWACY, Ndayishimiye Samson, yishimiye iki gikorwa cya Skol ariko na none avuga ko ntaho bihuriye no kuba uru ruganda rwagaruka mu mukino w'amagare nk'umuterankunga ruherukamo muri 2021.
Ati "ni igikorwa cyiza, ibi bikoresho bizafasha cyane mu iterambere ry'umukino. Skol iduhaye Noheli hakiri kare, si iya FERWACY ahubwo ni iy'abakinnyi bacu "
Muri rusange Skol yatanze amagare 17, ibikoresho bitandukanye by'ibice bishobora gusana amagare (spare parts), imyambaro (bibs) 339, jerseys 594, inkweto 66, Ga (Gants) 39, ingofero (Helmets) 104, amacupa y'amazi 500, ibikombe 116 byo guhemba abitwaye neza mu marushanwa atandukanye ndetse n'amadarubindi (glasses).
Source : http://isimbi.rw/siporo/article/skol-yahaye-ferwacy-ibikoresho-byinshi-birimo-amagare-17-amafoto
