Kuri uyu wa Gatatu tariki 14 Gashyantare 2024, Minisiteri y'Urubyiruko ndetse n'Ubuhanzi yagiranye ibiganiro nyunguranabitekerezo n'abahanzi mu ngeri zinyuranye byibanze cyane ku bunyamwuga bukenewe mu kazi bakora mu cyerekezo cy'u Rwanda, imbogamizi bagihura nazo ndetse n'ibyo bifuza ku gihugu.
Ni inama yabaye mu gihe hari abahanzi bataratera intambwe yo kujya mu mahuriro yashyizweho (Federation). Ijwi rya bamwe ryumvikana rivuga ko nta nyungu babona mu mahuriro, ari nayo mpamvu banze kwisungana na bagenzi babo.
Minisitiri Dr Jean Nepo Abdallah Utumatwishima yagaragaje ko Leta yiteguye gushyigikira abahanzi, ariko abasaba kujya mu mahuriro, kuko buri muhanzi wese uzajya asaba guterwa inkunga na Minisiteri agomba kuba afite ihuriro abarizwamo, kuko ari ryo rizamuvuganira.
Umuyobozi w'Inama y'Igihugu y'Abahanzi, Niragire Marie France washinze Genesi TV yabwiye InyaRwanda, ko bishimiye kuba Leta yatekereje ku bahanzi bugahabwa Minisiteri ibushinzwe.
Yavuze ko iyi nama ibaye mu gihe nk'ubuyobozi bushya bamaze gutangira imishinga itatu irimo gushyiraho ikigega nzahura bukungu cy'abahanzi, ubwishingizi bwo kwivuza ku muhanzi, uburezi n'ibikorwaremezo by'ubuhanzi ku rwego rw'Igihugu.
Niragire yavuze ko iyi mishinga iri 'mu mushinga yashyira ibuye fatizo mu iterambere ry'ubuhanzi ku rwego rw'Igihugu'.
Yavuze ko izakorwa kubufatanye bw'abahanzi bose b'u Rwanda, yaba ababa mu Rwanda, ababa mu mahanga, inzego za Leta ndetse n'inkunga zitandukanye 'hakurikijwe icyiciro uwo mushinga uherereyemo'.
Niragire yavuze ko abahanzi bakeneye ubwishingizi bw'ubuzima 'kuko ubuhanzi dukora ni umurimo nkindi mirimo yose itunze banyirayo n'imiryango yabo'.
Ati 'Ubwishingizi butanga umusanzu cyane ku kiremwamuntu mu buryo bwo kubaka amarangamutima ya muntu, urukundo, kubaho kwa buri munsi, kunezerwa, kwidagadura no kuruhuka ku bwonko.'
Akomeza ati 'Iyo duhanga harimo imbogamizi nyinshi zikubiyemo impanuka n'uburwayi bwaterwa n'ubuhanzi runaka ukora.'
Abahanzi bakora amanywa n'ijoro, bakoresha ingingo zabo z'umubiri cyane ndetse guhanga bisaba imbaraga z'ubwonko n'imbaraga z'umubiri hakongerwamo n'amarangamutima menshi. Niragire ati 'Ku bw'ibyo twasanze dukeneye umuhanzi 'insurance'.
Niragire yavuze ko bizasaba ko buri muhanzi azatanga umusanzu we, ndetse hanarebwe umusanzu uturuka mu bihangano ahanga, kugirango umushinga w'ubwishingizi ushyirwe mu bikorwa.
Ati 'Hazabaho umusanzu w'umuhanzi habeho umusanzu uturuka mu bihangano byacu hongerwemo n'inkunga zitandukanye, hakurikijwe ubwishingizi dukeneye ubwari bwo nk'uko ibyiciro by'ubwishingizi buri.'
Yavuze ko kugirango umuhanzi abuhabwe bizasaba kuba ari umunyamurwango wa Rwanda Arts Council, kandi bizasaba kuba hari urwego abarizwamo mu cyiciro cy'ubuhanzi akora nk'uko byubatswe na Rwanda Arts Council (RAC).
 Minisitiri Utumatwishima yasabye abahanzi kwibumbira mu mahuriro, kuko ari bwo Leta izoroherwa no kubatera inkunga
Â
Niragire Marie France yatangaje ko hagiye gushyirwaho ubwishingizi bw'abahanzi
 Abahanzi bagaragarije Leta ibigitsikamira urugendo rw'ubuhanzi bwabo, ndetse n'ibyo bishimira bamaze kugerahoÂ
Kanda hano urebe amafoto menshi yaranze inama yahuje abahanzi
Source : https://inyarwanda.com/inkuru/139726/abahanzi-bagiye-guhabwa-ubwishingizi-bwubuzima-139726.html
