Yabigarutseho kuri uyu wa Gatatu tariki 14 Gashyantare 2024, mu kiganiro yahuriyemo Dorcy Rugamba, Umuhanzi akaba n'Umuyobozi wa Rwanda Arts Initiative, umukinnyi w'ikinamico, Nibagwire Didacienne uri mu bashinze inzu y'ubuhanzi ya L'Espace ndetse na Rwagasani Braddock Le Sage, Umwanditsi w'ibitabo akaba n'Umuyobozi mu Nama y'Igihugu y'Abahanzi.
Iki kiganiro cyayobowe na Rugasaguhunga Ruzindana, Umujyanama w'Umunyamabanga wa Leta muri Minisiteri y'Urubyiruko n'Iterambere ry'Ubuhanzi, cyari gishamikiye ku Nama yahuje abahanzi mu ngeri zitandukanye, ku insanganyamatsiko igira iti 'Ubunyamwuga mu buhanzi bubyara inyungu mu cyerekezo cy'u Rwanda.'
Uyu mugore yasobanuye ko yinjiye muri cinema mu gihe ibintu byari bitangiye kumera neza, ariko kandi 'ntibyari byoroshye'. Yatangiye gukora filime mu gihe hari izizwi cyane nka 'Ikigeragezo cy'ubuzima' yakinnyemo abarimo umuhanzikazi w'indirimbo zo kuramya no guhimbaza Imana, Aline Gahongayire.
Yavuze ko gukurira mu maboko meza byamufashije gukina muri filime zitandukanye nka City Maid n'izindi 'byampaye kwiga'. Bahavu yagaragaje ko muri icyo gihe nta mashuri menshi yari ahari yo kwigisha Cinema, ku buryo byari gutuma acika intege, ariko kandi yagiye akomeza gushyira imbaraga.
Uyu mukinnyi wa filime yumvikanishije ko atangira urugendo, abakinnyi ba filime batishyurwaga menshi 'kandi no muri iki gihe niko bikimeze'.
Yavuze ko atangira urugendo rwo kwikorera filime, yagiye atira ibikoresho, ndetse hari bamwe mu bakinnyi yagiye asaba kumutiza imbaraga, ibintu bigenda birushaho kuba byiza kuri we.
Bahavu yavuze ko atangira gukora filime, yafunguye urubuga rwa Youtube, zimwe muri filime ze atangira kuzinyuzaho, ari nako abona amafaranga avuyemo.
Igihe cyaranageze filime ye 'Impanga' itangira gutambuka kuri Televiziyo Rwanda yishyuwe, aza no gutekereza uko yashinga urubuga rwa Internet yise ABA TV.
Uyu mukinnyi wa filime yavuze ko nyuma yo gukorera abandi nawe yatangiye kwikorera, bituma muri iki gihe iyo akoze imibare asanga amaze gutanga akazi ku bantu barenga 200.
Kugeza ubu, filime ye 'Impanga' iri mu rurimi rw'igiswahili; kandi avuga ko byahaye akazi abanyamahanga bahindura iyi filime mu rurimi.
Yavuze ko hamwe no 'gushyigikirana n'urugendo rwiza' hari intambwe amaze gutera. Kandi, avuga ko muri iki gihe hari aba Producer benshi batanga akazi, kandi n'umubare w'abakina filime wariyongereye. Ati "Turacyakomeje urugendo rwo kwiteza imbere muri Cinema."
Bahavu yagaragarije Minisitiri w'Urubyiruko n'iterambere ry'Ubuhanzi, Dr Utumatwishima ko n'ubwo bimeze gutya bagifite imbogamizi zirimo kubura aho gufatira amashusho (Location) bituma hari abashoramari bajya gukorera filime mu cyaro 'atari uko babikunze ahubwo kuko ariho ubushobozi bushoboka ko abantu bakodesha aho gukorera.'
Yavuze ko agitangira kwikorera filime yatekereje ko igihe kigeze kugirango zitangire gusa neza, kandi zifatirwe mu mazu meza, imihanda myiza mu rwego rwo kugaragaza u Rwanda ku rwego mpuzamahanga. Ati "Byari muri gahunda yo kugaragaza u Rwanda na Visit Rwanda muyerekeze muri Cinema."
Uyu mugore yavuze ko hari abantu bamaze imyaka irenga 20 batagera mu Rwanda, bityo ko Cinema yifashishijwe yafasha mu gukurura ba mukerarugendo. Ati "(Twabikora) tukagaragaza Igihugu tutavuze."
Yavuze ko hari Hoteli nziza mu Rwanda abakinnyi ba filime baba bifuza gukoreramo ariko bakazitirwa. Ati "Hari hoteli mu Rwanda udashobora kwinjizamo Camera. Minisitiri (Utumatwishima) turagusabye rwose udushyigikire ubuyobozi bwacu bushyashya nabwo budushyigikire, tubone 'Location' mu buryo bworoshye tugaragaze Igihugu cyacu neza, kigaragare neza, twerekane Hoteli zacu nziza [Akivuga iri jambo bakomye amashyi].'
Bahavu yavuze ko abanyamahanga bifuza kumenya byinshi k'u Rwanda, kandi ko hifashishijwe Cinema byakoroha. Yatanze urugero avuga ko nko gufatira amashusho mu mazu ya Leta nko mu Ikigo cy'Igihugu cy'Iterambere (RDB) bidashoboka.
Uyu mugore yibukije ko abakinnyi ba filime bakigorwa mu buryo bukomeye no gukoresha 'Drone' kuko bisaba gukurikiza amabwiriza ahambaye. Yungamo ati "Biragoye gukoresha umuhanda mwiza nta 'Drone'. Minisitiri (Utumatwishima) mudufashe byibuza niyo mwahereza 'Federation' Drone imwe tukajya tugerayo tukabasaba, tukabereka ibyo tugomba gufatira amashusho ibyo ari byo ariko ihari..."
Yavuze ko kugeza ubu abakoresha 'Drone' muri filime zabo ari bacye. Bahavu ahamya ko ikoreshwa rya Drone ari kimwe mu byatumye u Rwanda rugaragazwa ku ruhando mpuzamahanga.
Mu 2023, uyu mukinnyi wa filime yakoreye urugendo shuri mu Mujyi wa Busan muri Korea y'Epfo. Yavuze ko yasanze uriya Mujyi waramenyekanye ku ruhando Mpuzamahanga biturutse kuri filime zagiye zihakorerwa.
Mu bihe bitandukanye bamwe mu bakoresha 'Drone' mu gufata amashusho, bagiye bagaragaza ko bagorwa cyane no kubona impushya zibemerera kuzikoresha, ndetse hari abagiye batabwa muri yombi kubera kuzikoresha nta ruhushya.
Muri Nzeri 2021, ubwo yari yitabiriye inama yateguwe n'Ikigo cy'Igihugu gishinzwe Indege za Gisivile (RCAA), Minisitiri w'Ikoranabuhanga na Inovasiyo, Ingabire Paula, yasobanuye ko gutinda gutanga impushya bigendana n'ubugenzuzi bubanza gukorwa.
Yavuze ati 'Biterwa no gushaka kurinda umutekano w'isanzure cyangwa w'abantu. Utwo tudege tuba tugenda hejuru y'abantu uba unatureba ahantu tugurukira ariyo mpamvu hagiye hagaragara ko huzuzwa ibyangombwa byinshi cyane kugira ngo tuzagabanye ko habaho impanuka no kuba twahungabanya umutekano w'abaturage.'
Umuyobozi ushinzwe kugenzura ingendo z'indege muri RCAA [Rwanda Civil Aviation Authority], Mutabaruka Andrew, we yasobanuye ko gutinda gutanga uruhushya hari igihe bituruka ku banze kuzuza ibisabwa.
Ati 'Kubera ko uruhushya rugomba gukurikiza inzira zose, iyo habayeho uruhande rumwe rutakoze neza ibyo rugomba gukora rushobora gutuma bitinda ariko icyifuzo cyacu ni uko bizajya bitebuka nibyo turi kugerageza gukora muri iki gihe kugira ngo dukosore aho bishobora kuba bitinda.'
Mu ngingo ya 99 y'iri tegeko, ivuga ko umuntu ukoresha 'drone' atabifitiye uburenganzira aba akoze icyaha. Iyo abihamijwe n'urukiko ahanishwa igifungo kitari munsi y'imyaka itatu ariko kitarenze imyaka itanu n'ihazabu y'amafaranga y'u Rwanda atari munsi ya miliyoni 5 Frw ariko atarenze miliyoni 10 Frw.
Mu ngingo ya 104 ho bavuga ku muntu utunze indege itagira umupilote itanditse aba akoze icyaha bityo ko iyo abihamijwe n'urukiko, ahanishwa igihano cy'igifungo kitari munsi y'amezi atatu ariko kitarenze amezi atandatu n'ihazabu itari munsi ya miliyoni 1 Frw ariko atarenze miliyoni 2 Frw cyangwa kimwe muri ibi bihano.
Ni mu gihe mu ngingo ya 105 ho bagaragaza ko nyir'indege itarimo umupilote utagaragaza ku buryo bugaragara ikirango cy'iyandikisha cy'iyo ndege cyatanzwe n'ikigo kibishinzwe, aba akoze icyaha.
Iyo abihamijwe n'urukiko ahanishwa igihano cy'igifungo kitari munsi y'ukwezi ariko kitarenze amezi ibiri n'ihazabu itari munsi y'ibihumbi 500 Frw ariko itarenze miliyoni 1 Frw cyangwa kimwe gusa muri ibyo bihano.
Bahavu yavuze ko imyaka amaze muri Cinema ari urugero rutari rworoshye, ariko kandi hamwe no kwiga no gukorana n'abandi ni inzira ishoboka 
Bahavu yavuze ko amaze gutanga akazi ku bantu barenga 200 nyuma yo gutangira kwikorera
Bahavu yasabye Minisitiri Utumatwishima kubavuganira mu nzego bireba bakoroherezwa gukoresha 'Drone' bagahabwa na Location