Rutahizamu wa Rayon Sports ukomoka muri Senegal, Paul Alon Gomis yavuze ko nubwo uyu munsi atameze neza ibintu bishobora guhinduka akaba yaguma muri iyi kipe.
Ni rutahizamu utaragize intangiriro nziza muri iyi kipe aho kureba mu izamu byanze ndetse benshi batangira kumushidikanyaho.
Ejo hashize akaba yaratsinze igitego cye cya mbere muri Rayon Sports, akaba ari igitego kimwe muri 3-1 batsinze Vision FC mu mukino wo kwishyura wa 1/4 cy'igikombe cy'Amahoro cya 2024 aho bahise banayisezerera ku giteranyo cy'ibitego 5-1.
Ubwo yari abajijwe uko yiyumva nyuma yo gutsinda igitego cya mbere yavuze ko bimufasha kwizamurira icyizere ariko bikaba byari kuba byiza kurushaho iyo atsinda igitego kitari penaliti.
Ati "Ku ruhande rumwe ni byiza ariko ku rundi si byiza. Nari kwishima kurushaho iyo mba ntatsinze penaliti ariko byose biramfasha kuzamura icyizere."
Yakomeje avuga ko yizeye ko uko umutoza azamugirira icyizere, azagenda agaruka mu bihe bye.
Ati "Ndakomeza gukora ni bwo nkirutse imvune, ndagenda ngaruka gake gake, uko umutoza azakomeza kungirira icyizere, nzagaruka ku rwego rwanjye."
Uyu rutahizamu wasinye amezi atandatu muri Rayon Sports, yavuze ko nta kidashoka n'umwaka utaha yaguma muri iyi kipe kuko nubwo uyu munsi bitameze neza ejo byahinduka.
Ati "kubera iki bidashoboka? Byose birashoboka, turimo turavuga iby'uyu munsi, ejo dushobora kubona ibitandukanye, birashoboka kuguma hano kuko numva meze neza muri Rayon Sports kandi umupira w'amaguru ni ko kazi kanjye."
Yavuze ko ko kandi kuba adatsinda nta gitutu afite ahubwo uko akomeza gukora akagirirwa icyizere azagera ku cyo yifuza ari wo mwanya uhoraho muri Rayon Sports.
Mu Kuboza 2023 ni bwo uyu rutahizamu w'imyaka 29 yageze mu Rwanda ariko asinyira Rayon Sports amasezerano y'amezi 6 muri Mutarama 2024, akaba ashobora kongerwa bigendanye n'uko azitwara kugeza shampiyona irangiye. Yaje aheruka gutandukana na ACS Ksar yo mu cyiciro cya mbere muri Mauritania.
