APR FC yaraye isezeyeho rutahizamu wa yo Nshuti Innocent ugiye gukina muri Leta Zunze Ubumwe za Amerika mu ikipe ya One Knoxville SC, ni nyuma y'imyaka 7 ayikinira.
Ni nyuma y'umukino w'umunsi wa 21 wa shampiyona y'icyiciro cya mbere umwaka w'imikino wa 2023-24 wo APR FC yanganyijemo na Bugesera FC.
Nshuti Innocent akaba yahawe impano y'umwambaro wa APR FC wanditseho izina rye, maze Chairman wa APR FC, Col Richard Karasira amusaba gufungurira inzira bagenzi be.
Ati 'Ni umuhungu wacu tubanye imyaka irenga 7, ejo afite urugendo (uyu munsi), turamwifuriza ibyiza, afungurire inzira n'abandi bose, ejo azahamagare bamwe muri bagenzi be bakinanaga.'
Kapiteni wa APR FC, Niyomugabo Claude we yamusezeyeho agira ati 'Unsigire umurima wawe njye nywuhingamo ibirayi. Ubu ibirayi bigiye kurumba kubera udahari.'
Yabivuze mu rwego rwo kumuserereza kuko Nshuti Innocent avuka i Musanze kandi akaba ari ko Karere kazwiho guhinga ibirayi mu Rwanda.
Nshuti Innocent yakuriye mu ishuri ryigisha umupira rya APR FC, yarigezemo afite imyaka 15 akaba yarazamuwe muri APR FC nkuru muri 2016, 2018 yaje kwerekeza mu ikipe ya Stade Tunisien aho atatinze kuko muri 2019 yahise agaruka muri APR FC.
