Michael James Owen yavutse taliki 14 Ukuboza mu 1979, avukira mu gace ka Cheshire mu gihugu cy'u Bwongereza.
Avuka kuri nyina witwa Jeannette mu gihe se yitwa Terry Owen ndetse akaba yaranakinnye umupira w'amaguru mu makipe nka Chershire City na Everton.
Michael Oween wakuze afana Everton cyane, yatangiye gukina umupira w'amaguru ku myaka 7 abifashijwemo na se umubyara wamubonagamo kuzavamo umukinnyi w'umupira w'amaguru ukomeye.
Ku myaka 12 gusa ni bwo yatangiye gukinira Liverpool y'abato nyuma yuko yanifuzwaga n'andi makipe y'abato arimo iya Chelsea ndetse n'iya Arsenal.Â
Yaragiye yitwara neza ndetse anayifasha gukora amateka mu 1995 yegukana igikombe cya FA Cup cyayo cya mbere abigizemo uruhare rukomeye.
Mu mwaka w'imikino wo mu 1969-1997 yaje kuzamurwa mu ikipe nkuru maze anatsinda igitego ku mukino we wa mbere bari bakinnyemo na Wimbledon muri Premier League.
Michael James Owen yaje kungukira mu bihombo bya Robbie Fowler wari usanzwe ari rutahizamu wa mbere wa Liverpool agira ikibazo cy'imvune bituma ariwe witabazwa imikino yose.
Aya mahirwe yayabyaje umusaruro ahita aba umukinnyi utsinze ibitego byinshi muri Premier League mu mwaka w'imikino wo mu 1997-98 ndetse anahabwa igihembo cy'umukinnyi mwiza ukiri muto.
Nyuma yaje kongera amasezerano y'imyaka 5 mu ikipe ya Liverpool asinyira kuzajya ahembwa ibihumbi 100 by'Amayero bituma ahita ashyiraho agahigo ko kuba umukinnyi ukiri muto uhembwe amafaranga menshi mu mateka y'umupira w'u Bwongereza.
Mu mwaka w'imikino wakurikiyeho nabwo Michael Owen ni we wabaye umukinnyi watsinze ibitego byinshi muri Premier League gusa nyuma aza kuvunika bituma amara hafi amezi 5 adakandagira mu kibuga.
Muri 2001 ni bwo Liverpool yegukanye ibikombe 3 birimo icya Europa League, icya Football League Cup ndetse n'icya FA Cup babifashijwemo na Michael Owen watsinze ibitego 2 ku mukino wa nyuma.
Ibi byaje gutuma uyu mukinnyi ahabwa igihembo cya Ballon d'Or ahita aba Umwongereza wa mbere wegukanye iki gihembo nyuma ya Kevin Keegan wari waracyegukanye mu 1979.
Michael Owen yegukana igihembo cya Ballon d'OrÂ
Kubera kwitwara neza Michael Owen yaje kongera amasezerano y'imyaka 4 muri Liverpool yemererwa kuzajya ahembwa ibihumbi 70 by'Amayero ku cyumweru.
Yakomeje kwitwara neza biza no kugera aho atsindira Liverpool ibitego 217 muri rusange mu mikino 297 yari amaze gukinira Liverpool ndetse atangira kwifuzwa n'amakipe atandukanye arimo Real Madrid ariko Gerard Houllier watozaga Liverpool icyo gihe akavuga ko batamugurisha.
Muri 2004Â byarangiye Michael Owen yerekeje muri Real Madrid aguzwe miliyoni 8 z'Amayero ariko agezeyo ibintu ntibyagenda neza, akajya yicazwa ku ntebe y'abasimbura bikanatuma abafana bamuvugiriza induru.
Yakinnyeyo imikino 36 atsindayo ibitego 13 muri shampiyona ahita asubira mu Bwongereza agiye gukina mu ikipe ya Newcastle United atanzweho miliyoni 16 z'Amayero. Agezeyo yatangiye kugira ibibazo by'imvune bituma amara amezi 18 adakandagira mu kibuga.
Nyuma yo kuva mu mvune yagarutse mu kibuga maze mu mwaka w'imikino wa 2007-08 ahita aba umukinnyi watsindiye Newcastle United ibitego byinshi ariko mu mwaka ukurikiyeho iyi kipe ihita imanuka muri shampiyona y'icyiciro cya kabiri.
Byatumye Michael Owen ahitamo kwerekeza mu ikipe ya Manchester United agendeye ubuntu, gusa naho ntabwo yigeze ahagirira ibihe byiza kubera ko mu myaka 3 yakinnyeyo imikino 31 atsindamo ibitego 5 gusa.
Muri 2012 yavuye mu ikipe y'amashitani atukura yerekeza muri Stoke City ariko ntiyakinayo imikino myinshi maze taliki 19 Werurwe muri 2013 atangaza ko asezeye ku mupira w'amaguru burundu.
Michael Owen yasize amateka muri Premier League arimo kuba umukinnyi ukiri muto wagejeje ku bitego 100 ndetse akaba no mu bakinnyi 10 batsinze ibitego 150.
Ku bijyanye n'ikipe y'igihugu y'u Bwongereza, uyu mukinnyi yatangiye kuyikinira ahereye mu kipe y'abatarengehe imyaka 15 maze mu 1998 aba ari bwo atangira gukinira iy'abakuru. Michael Owen yabaye umukinnyi ukiri muto ukiniye u Bwongereza ndetse akanatsinda igitego.
Muri rusange yayikiniye imikino 89 atsindamo ibitego 40 gusa nta gikombe yigeze atwarana nayo.
Uyu ni umwe mu bakinnyi bazaba bari mu Rwanda mu kwezi kwa 9 guhera tariki ya 1 kugeza ku ya 10 uyu mwaka wa 2024 mu mikino y'Igikombe cy'Isi cy'abakanyujijeho kizakinirwa i Kigali.
Michael Owen yakoreye amateka mu ikipe ya Liverpool ndetse anafatwa nk'umunyabigwi wayo
Michael Owen yinyijuje muri Real Madrid ariko ntibyagenda neza
Michael Owen mbere yo gusoza ruhago yakiniye na Manchester UnitedÂ
Uyu munyabigwi ategerejwe i KigaliÂ
