Perezida Paul Kagame yitabiriye imikino ifungura irushanwa rya Basketball Africa League 2024 (BAL 2024) ryatangiye kubera mu Rwanda uyu munsi.
Uyu munsi ku wa Gatanu tariki ya 24 Gicurasi ni bwo amakipe 8 yitwaye neza muri Conferences yatangiye urugendo rwo guhatanira igikombe BAL 2024 kirimo kubera mu Rwanda muri Kigali Arena.
Umukino wabimburiye indi ni uwo Al Ahly Benghazi yo muri Libya yatsinzemo Cape Town Tigers BBC yo muri Afurika y'Epfo amanota 87-76.
Hahise hakurikiraho umukino karundura wahuje Al Ahly yo mu Misiri na FUD Rabat yo muri Maroc.
FUS Rabat ikaba nta kosa na rimwe yakoze yaje gutsinda uyu mukino ku manota 89-78 ya Al Ahly.
Nubwo nta kipe yo mu Rwanda yari irimo, Perezida Kagame yari yaje kureba iyi mikino yabaga ku nshuro ya kane.
Abari muri Kigali Arena bakaba basusurukijwe n'abahanzi nka Juno Kizigenza mu ndirimbo Peace of Mind yasubiranyemo na Shemi bari kumwe ku rubyiniro, Kurura yakoranye na Bushali, Igitangaza yafatanyije na Bruce Melodie na Kenny Sol ndetse na Yaraje yitiriye Album aheruka gushyira hanze.
Umuhanzi kandi w'icyamamare ukomoka muri Nigeria, Adekunle Gold yakoreye amateka muri Kigali Arena aho yashimishije abari bitabiriye iyi mikino mu ndirimbo ze nka 'Party No Dey Stop', 'Do You Mind?' '5 Star' n'izindi.
